Ֆուտբոլի Հայաստանի ազգային հավաքականը մեկնարկել է աշխարհի 2014 թվականի առաջնության ընտրական փուլում: Մեր ընտրանին մրցակցի հարկի տակ իր ուժերն է չափում Մալթայի ազգային հավաքականի հետ:
Առաջին խաղակեսում գոլեր չխփվեցին, սակայն մեր հավաքականը հաշիվը բացելու երկու իրական հնարավորություն ուներ: Մարկոսի` 30-րդ րոպեին կատարած հարվածից հետո գնդակը դարպասային գծից հեռացրեց մրցակցի պաշտպանը: 36-րդ րոպեին նպաստավոր դիրքում հայտնվեց Մխիթարյանը, սակայն գնդակի ճանապարհը փակեցին մրցակցի խաղացողները:
Երկրորդ խաղակեսում նույնպես մեր ֆուտբոլիստները չէին կարողանում բեկել խաղի ընթացքը, մինչև 64-րդ րոպեն, երբ խաղադաշտ դուրս եկավ Արթուր Սարկիսովը` փոխարինելով Մարկոս Պիզելիին: 6 րոպե անց Սարկիսովը դարձավ գեղեցիկ գոլի հեղինակ, իսկ Յուրա Մովսիսյանն արդյունավետ փոխանցում կատարեց:
Խաղավերջում աչքի ընկնելու լավ հնարավորություններ ուներ Հենրիխ Մխիթարյանը: Երկու դեպքերում էլ հաջող խաղաց մրցակցի դարպասապահը:
Այսպիսով` Մալթա- Հայաստան` 0:1: Սարկիսովը հաղթանակ պարգևեց մեր ընտրանուն, իսկ մեր հավաքականը վաստակեց առաջին 3 միավորը: