Սիրիայի իշխանությունները քիմիական զենքի պաշարները և բաղադրիչները կենտրոնացրել են երկրի ներսում` 20 քաղաքներում. այսպես են կարծում ԱՄՆ-ի և Մերձավոր Արևելքի երկրների հետախուզության ներկայացուցիչները:
Washington Post թերթը նշում է, որ հետախույզները մանրակրկիտ ուսումնասիրում են իրավիճակը Սիրիայում և հետևում են քիմիական զենքի պահեստներին, սակայն առայժմ չեն կարողանում պարզել այն վայրերը, որտեղ տեղափոխվել են զենքի պաշարները: Թերթը եզրակացնում է, որ որոշ քանակությամբ թունավոր նյութեր կարող են գողացվել կամ օգտագործվել Սիրիայի իշխանությունների կողմից խաղաղ բնակչության դեմ:
Ասադի վարչակարգի անկման սպառնալիքն ԱՄՆ-ին ստիպում է առավելագույն ուշադրություն հատկացնել Սիրիայում քիմիական զենքի պահպանման անվտանգության կանոններին:
ԱՄՆ-ի հետախուզության և Մերձավոր Արևելքի հատուկ ծառայությունների տվյալներով` Սիրիան մի քանի տոննա քիմիական զենք և դրա գործարկման համար բաղադրիչներ ունի, ներառյալ` նյարդակաթվածային ներգործության զարին թունավոր նյութ:
Հետախուզության ներկայացուցչի խոսքով` Սիրիայի քիմիական զենքի պաշարների անվտանգության ապահովման համար «ԱՄՆ-ը քննարկում է բոլոր հնարավոր տարբերակները»:
Ավելի վաղ ԱՄՆ-ի նախագահ Բարաք Օբաման հայտարարեց, որ Սիրիայում քիմիական ամբողջ զենքի տեղափոխման կամ օգտագործման դեպքում Վաշինգտոնը կարող է վերանայել հակամարտության լուծմանն իր ներկայիս մոտեցումը: Որոշ ԶԼՄ-ներ դա գնահատեցին որպես Սիրիայում ռազմական միջամտության պատրաստակամություն, բայց հաջորդ օրը Սպիտակ տունը հերքեց դա և խնդրեց ԶԼՄ-ներին նախագահի խոսքերը չափազանց ազատ չմեկնաբանել:
Հակամարտությունը Սիրիայում շարունակվում է 2011-ի մարտից: ՄԱԿ-ի ներկայացուցիչների տվյալներով` դրան զոհ է գնացել 17 000 մարդ: Արևմտյան պետությունները և մի շարք արաբական երկրներ փորձում են հասնել նախագահ Բաշար Ասադի հեռանալուն` համարելով, որ դա վերջ կդնի բռնությանը: Ռուսաստանը և Չինաստանը` ընդհակառակը, մտավախություն ունեն, որ Սիրիայում արտաքին միջամտությունը և պետականության կորուստը կհանգեցնեն հակամարտության խորացմանը:
