Ինչպես չորեքշաբթի օրը` փետրվարի 24-ին, հայտնել է France Presse գործակալությունը, ԱՄՆ-ում ձերբակալվել է Սաուդյան Արաբիայի մի քաղաքացի, որը պլանավորել էր պայթեցնել Ջորջ Բուշ կրտսերի տունը:
20-ամյա Խալիդ Ալիմ Ալդավսարին մեղադրվում է ԱՄՆ-ի տարածքում զանգվածային ոչնչացման զենքի օգնությամբ ահաբեկչությունների նախապատրաստման մեջ: Իրավապահ մարմինները դուրս են եկել հետքին այն բանից հետո, երբ ՀԴԲ (FBI) բողոք է ստացվել քիմիական նյութեր ներմուծողի կողմից: Նա հայտնել է, որ Ալդավսարին փորձում էր մեծ քանակությամբ ֆենոլ գնել, որն օգտագործվում է պայթուցիկի պատրաստման ժամանակ:
Ինչպես հայտնել են ՀԴԲ-ում, Ալդավսարին իր սեփական էլեկտրոնային փոստին երկու նամակ է ուղարկել, որտեղ թվարկում է այն օբյեկտները, որոնք հարմար են ահաբեկչության համար: Առաջին նամակում, որը ուներ «Լավ նշանակետեր» վերնագիրը, նշված են ԱԷԿ և հիդրոէլեկտրոկայաններ:
Երկրորդ նամակում «Բռնապետի տունը» վերնագրով նշված է եղել Տեխաս նահանգի Դալլաս քաղաքում ԱՄՆ նախկին նախագահ Ջորջ Բուշի տունը: Բացի այդ, նա պլանավորել էր նաև խաղալիքի մեջ պայթուցիկ հարմարացնել ու պայթեցնել գիշերային ակումբներից մեկը:
Սաուդյան Արաբիայի քաղաքացին ԱՄՆ է եկել 2008 թ. ուսանողական վիզայով: Նա կիրառական քիմիա էր սովորում Տեխասի տեխնոլոգիական համալսարանում (Texas Tech University),- հայտնում է The Los Angeles Times-ը: Նրա տան խուզարկության ժամանակ հայտնաբերվել են քիմիական ռեագենտներ և լաբորատոր սարքեր, քիմիական պաշտպանության հագուստ և էլեկտրական լարեր:
«Հիմա, երբ ես սովորել եմ անգլերեն, ինչպես նաև կարող եմ պայթուցիկ սարքել և ահաբեկչական ակտ կազմակերպել անմեղ քաղաքացիների հանդեպ, եկել է ջիհադի ժամանակը», – ՀԴԲ-ում մեջբերում են նրա օրագրում հայտնաբերված տողերը: Հայտնվում է նաև, որ նա բլոգ է ունեցել, որտեղ ջիհադի կոչեր է արել:
