Արդեն բավական երկար ժամանակ է ղարաբաղյան հարցի կարգավորման բանակցային գործընթացում որպես հիմնական միջնորդ հանդես է գալիս Ռուսաստանը: Սակայն ԱՄՆ պետքարտուղարի առաջին տեղակալ Ջեյմս Սթեյնբերգի այցը Հայաստան, որը հաջորդում է Ռուսաստանի ԱԳ նախարարի տեղակալ-պետքարտուղար Գրիգորի Կարասինի այցին, շատերի կարծիքով, վկայում է այն մասին, որ ԱՄՆ-ն որոշել է գործընթացի կարգավորումն իր ձեռքը վերցնել:
Երևանի պետական համալսարանի Քաղաքակրթական և մշակութային ուսումնասիրությունների կենտրոնի տնօրեն, քաղաքական վերլուծաբան Դավիթ Հովհաննիսյանը «Առաջին լրատվականի» զրույցում կարծիք հայտնեց, որ Միացյալ Նահանգներն այսօր այնքան մեծ խնդիրների մեջ է ներգրավված և այնքան շատ գլխացավ ունի տարբեր պատճառներով, որ դժվար թե հիմա փորձի ակտիվանալ մեր տարածաշրջանում, առավել ևս, որ վերջին երեք տարիների ընթացքում նկատվում էր ԱՄՆ-ի դերակատարության նվազում մեր տարածաշրջանում:
«Պետքարտուղար Հիլարի Քլինթոնի այցը տարածաշրջան, իմ գնահատմամբ, փորձ էր նշելու Միացյալ Նահանգների ներկայությունն այստեղ, որովհետև իրականում այդ ներկայությունը բավականին նվազել է: Ավելին, իմ գնահատմամբ, ԱՄՆ-ին շատ ձեռնատու է, որ համագործակցելով Ռուսաստանի իշխանությունների հետ` այս տարածաշրջանի և ընդհանրապես սևծովյան, կասպյան տարածաշրջանի պրոբլեմատիկ հարցերը կարգավորվեն Ռուսաստանի և Թուրքիայի օպերատիվ գործողությունների արդյունքում, քանզի ԱՄՆ-ն դրանցով զբաղվելու հնարավորություն այժմ չունի»,- նշեց վերլուծաբանը:
