Չնայած Արարատյան դաշտում գարնան գյուղատնտեսական աշխատանքների շրջանը դեռ չի սկսվել, բայց գյուղացիներն այս տարի մի քիչ շուտ են դաշտ մտել: Եղանակը բարեհաջող է, և սկսել են այգիների էտը:
Արմավիրի մարզի Հացիկ գյուղի բնակիչ Մարտուն Խաչատրյանը 1 հա ծիրանի և մոտ 3000 քմ խաղողի այգի ունի: Սկսել է աշխատել ծիրանի այգում, ծառերն է էտում, չորացած տնկիները հանում և տեղը նոր ծառեր տնկում: Սակայն ասում է, որ այս տարի այգիների վիճակն ավելի անմխիթար է լինելու:
Դեռ աշնանը նկատել էր, որ դաշտամկները շատացել են, բնականաբար, գարնանը վնասի չափն է մեծ լինելու: Դեռևս աշնանը գյուղապետարանից կրծողների դեմ թունաքիմիկատ է ստացել ու ցանել հողամասում: Մի անգամ էլ իր հաշվին է նույն միջոցը կիրառել: Բայց՝ անօգուտ։
Մարտուն Խաչատրյանը հիշում է, որ 5-6 տարի առաջ էլ այգում մկներ էր նկատել, բայց հետո դրանք անհասկանալի պատճառներով վերացել էին: Անցած տարի մկները վերադարձել են ու այս անգամ ավելի շատ են: Մնում է՝ պետությունը մտածի ու ձեռք մեկնի գյուղացուն: