«ՀՀ պաշտպանության նախարարությունը զինծառայողներին թերևս կերակրում է մեր համայնքի հաշվին»,-ասում են Շիրակի մարզի Ազատան գյուղի բնակիչները:
Բանն այն է, որ դեռևս 2 տարի առաջ պաշտպանության նախարարությունը Ազատանից գնել է կարտոֆիլ: Միայն 2009թ-ի բերքահավաքից ազատանցիներն կարտոֆիլը վաճառել են 1 կգ-ը` ընդամենը 30 դրամով:
Ընդհանուր առմամբ, մոտ 6 մլն դրամի կարտոֆիլ են վաճառել: Առ այսօր գյուղացիներին չի վճարվել 3 մլն 100 հազար դրամը:
ՊՆ պատասխանատուները ասել են, որ իրենք գումարը ամբողջությամբ մատակարար կազմակերպությանն են տվել: Գյուղացիներին խորհուրդ են տվել դիմելու միջնորդ կազմակերպություններին:
Վերջիներս էլ պնդում են, որ դեռ ՊՆ գումարը չի տվել:
«Երբ վճարեն, իրենք կբերեն կտան ազատանցիների փողերը»,-ասել են գյուղացիներին: Պաշտպանության նախարարությունից խոստացել են գումարը անպայման գտնել ու վճարել:
Գյուղապետ Վարդան Իկիլիկյանի խոսքով, մատակարար կազմակերպություններին գտնելու և գումարները շահառուներին հասցնելու խնդրով զբաղվում է անձամբ պաշտպանության նախարար Սեյրան Օհանյանը:
Փոխվարչապետ Արմեն Գևորգյանը նույնպես տեղյակ է խնդրին: Չնայած հարցը փորձում են կարգավորել կառավարական մակարդակով, այնուամենայնիվ, գյուղացիները սայլը տեղից շարժվելը դեռ չեն նկատել: