Գլենդելի բնակիչ, 72-ամյա հայ տղամարդը պնդում է, որ երկու տարի առաջ՝ 2010-ի մայիսի 9-ին, Glendale Galleria առևտրի կենտրոնում 2 ոստիկաններ՝ Աարոն Զիգլերն ու Ֆրանցիսկո Մարտինեսը, իրեն ձերբակալելիս անհարկի ուժ են կիրառել, ինչի հետևանքով կոտրել են իր թևը: Այս մասին հաղորդում է Glendale News Press-ը:
Դատարանում նա վկայություն է տվել թարգմանչի օգնությամբ: Միրզայանը հայտնել է, որ այդ օրը ինքը դեղատոմսով հաբեր է ընդունել և ընկերոջ հետ Glendale Galleria (Լոս Անջելեսի առևտրի, սնվելու և ժամանցի խոշորագույն կենտրոն) գնացել, որտեղ հանդիպել է ևս մեկ ծանոթի, և միասին կես բաժակ լիկյոր են խմել:
Այնտեղից դուրս գալիս Միրզայանը ասել է ոստիկաններին (որոնց հագին քաղաքացիական հագուստ է եղել, և որոնք նստած են եղել սրճարանում), որ իրեն հեռանալու մի քանի կոչ են արել, սակայն չեն ներկայացել որպես ոստիկաններ: Ոստիկանները հրել են իրեն և ոլորել թևերն այնքան, մինչև նա ցավից ուշաթափվել է:
«Ես պարզապես ցանկանում էի ասել, որ այդպես ճիշտ չէ»,- հայտնել է Միրզայանը:
Հայ տղամարդն արթնացել է հիվանդանոցում՝ կոտրված թևով:
Դատարանում ցուցադրվել է տեսագրություն, որտեղ երևում է, թե ինչպես է Միրզայանը մոտենում ոստիկաններին և ինչ-որ բան ասում, այնուհետև Միրզայանին է մոտենում Մարտինեսը, ու այդտեղ տեսագրությունն ավարտվում է: Միրզայանի փաստաբանի պնդմամբ` Մարտինեսը «մշակման է ենթարկել» տեսանյութը:
Միրզայանին ձերբակալել էին հասարակության առջև հարբած հայտնվելու համար:
Տեսագրությունում նույնիսկ երևում է, թե ինչպես է Միրզայանի ընկերը փորձում նրան հեռացնել այնտեղից: Բժիշկը հայտնել է, որ Միրզայանը նաև ուսի վնասվածք ունի, սակայն այն ստացվել է վերջին կոտրվածքից տարիներ առաջ:
Հերթական լսումները տեղի կունենան այսօր: