Սյունիքում ուրանի հանքավայրի երկրաբանահետախուզական աշխատանքների իրականացումը այս պահին դադարեցված է: Վերջին օրերին, որոշ բնապահպանական կազմակերպություններ հայտարարեցին նույնիսկ, որ լեռնաձորցիները լքում են իրենց տները: Ավելին, ասում են, որ «Հայ-ռուսական լեռնահանքային կազմակերպություն» ՓԲԸ-ին շահագործման արտոնագիր է տրված:
«Այդպիսի բան չկա, մենք երկու օրը մեկ լինում ենք Լեռանձորում, Փուխրուտում, ոչ մի աշխատանք չի արվում, բնակիչներն էլ չեն լքում իրենց տները: Ոչ մի շահագործման լիցենզիա էլ դեռ չկա»,- «Առաջին լրատվական»–ի հետ զրույցում ասաց հակաուրանյան շարժման առաջին նախաձեռնող, «Ազատամարտ» կոմիտեի նախագահ, Կապանի ավագանու անդամ Խորեն Հարությունյանը:
Վերջինս զարմանում է, թե ինչու են ոմանք իրենց իրավունք պահում հայտարարելու, որ ուրանի հանքերի դեմ ստորագրահավաքը շարունակվում է: ««Կապանի տարածաշրջանի զարգացման հիմնադրամի»-ի հետ էինք նախաձեռնել ստորագրահավաքը, 13,850 ստորագրություն ուղարկել ենք համապատասխան ատյաններին: Ստորագրահավաքն էլ այս օրերին չի շարունակվում»,-ասաց Խ. Հարությունյանը` ասելով, որ սա չի նշանակում, թե իրենք հրաժարվում են հակաուրանյան պայքարից:
«Շարունակելու ենք պայքարը, բայց պիտի իմանանք` ինչի դեմ: Պաշտոնապես տեղեկացվել ենք, որ ուրանի հանքավայրեր Լեռնաձորում չի հայտնաբերվել: Նաև հետախուզական աշխատանքները հնարավոր է շարունակվեն մարզի այլ վայրերում»,-ասաց Կապանի ավագանու անդամը:
Խ. Հարությունյանի խոսքով, պայքարի այլ ուղիներ ու ռազմավարություն է ընտրվելու: Հակաուրանյան պայքարի սյունեցի կազմակերպիչները զարմանում են, թե ինչպես կարելի է մի երկու-երեք օր գալ Սյունիք, Լեռնաձոր, ու անընդհատ գրել այդ մասին:
«Մի քանի ամիս առաջ ունեցած տեղեկատվությունը տարբեր կերպ օգտագործում են, երևի դրամաշնորհային ծրագրերի սեզոն է բացվել, բնապահպանական ՀԿ-ները պետք է ակտիվանան»,-ասում է Խ. Հարությունյանը:
Վերջինս դեմ չէ, որ մարդիկ գրանտներ շահեն, հանդիպումներ ու հանրային քննարկումներ կազմակերպեն: Բայց դեմ է, որ մարդիկ անընդհատ մի թեմա անտեղի շահարկեն` իրենց նպատակների համար:
Ի դեպ, «Ազատամարտ» կոմիտեի անդամներն ու ընդհանրապես կոմիտեի գրասենյակում հավաքվածները մի փաստի վրա էլ էին զարմացած:
«Բա էդ ինչո՞ւ տիկին Ինգան ու մյուս երևանցի բնապահպանները չեն բողոքում, չեն աղաղակում վերջերս բացված Գեղիի հանքի մասին, ինչո՞ւ հանրային լսումներ չեն կազմակերպում: Բա որ Կապանում ջուր չկա, սաղ ջրերը գնում ա էդ հանքը, դե եթե անկախ բնապահպաններ են, ժողովրդի մասին մտածում են, թող դրա մասին էլ խոսեն»,-ասացին ազատամարտիկները:
Հիշեցնենք, որ անցած տարվա դեկտեմբերի 1-ին ծովի մակերևույթից 2200-2600 մետր բարձրության վրա` Գեղիում, գործարկվեց «Լեռ-էքս» ՍՊԸ-ի Հանքասարի պղնձամոլիբդենային հանքավայրի կենտրոնական տեղամասը: Իսկ «Լեռ-էքս»-ի խորհրդի նախագահը Սյունիքի մարզպետ Սուրիկ Խաչատրյանն է: Մեկնաբանություններն ավելորդ են:
