ԱԺ նախկին պատգամավոր, ԱԺ նախագահի արդեն նախկին խորհրդական, տնտեսագետ Թաթուլ Մանասերյանը սեփական նախաձեռնությամբ հայտնվել է շատ վատ իրավիճակում` դատական շրջապտույտների մեջ, որոնցից կարծես թե չի էլ կարողանում դուրս գալ:
Մի կողմ թողնելով Թաթուլ Մանասերյանի գումարային ու դատական մյուս բոլոր հարաբերությունները` նշենք, որ նա որոշել է «Ժամանակ» օրաթերթից փող ուզել, քանի որ մենք համարձակվել էինք նրա ունեցած փողային պատմություններից մի փոքրիկ, բայց կարևոր մաս ներկայացնել հանրությանը:
«Ժամանակ» օրաթերթը 2010-ի սեպտեմբերի 29-ի համարում հրապարակել էր «Քրգործ` ԱԺ նախագահի խորհրդականի դե՞մ» վերտառությամբ և հետևյալ բովանդակությամբ մի տեղեկություն. «ՀՀ ԱԺ նախագահ Հ.Աբրահամյանի (նախկին) խորհրդական Թաթուլ Մանասերյանի դեմ քրեական գործ է հարուցվել, և այն գտնվում է ոստիկանության Կենտրոնի քննչական բաժնում` հատուկ կարևորագույն գործերով քննիչներից մեկի վարույթում: Թ.Մանասերյանին կասկածում են վաշխառությամբ զբաղվելու մեջ: Մեկ այլ քրեական գործի շրջանակներում որպես վկա հրավիրված անձանցից մեկը միամիտ բերանից թռցրել է, որ Թաթուլ Մանասերյանն իրեն տոկոսով փող է տվել: Ասում են` այդպես էլ ծնվել է քրգործը»: Այս լուրից խիստ անհանգստացած և զայրացած Թ.Մանասերյանը զանգահարել էր խմբագրություն և պահանջում էր, որ հերքենք լուրը և ներողություն խնդրենք իրենից ոչ ճիշտ տեղեկատվության համար, սակայն մենք մի փոքր մանրամասնեցինք գործի հանգամանքները և «Պարոն Մանասերյան, $ 40.000 տոկոսով չե՞ք տվել» վերնագրով մի լուր էլ տպագրեցինք մամուլում:
Այժմ որպեսզի մեր ընթերցողին ավելի պարզ լինի մեր լուրի հավաստիությունը` մի կողմ ենք թողնում վաշխառության փաստով հարուցված (մեր տեղեկություններով, նման գործ կա, հակառակ դեպքում դա կդիտվի քրեորեն պատժելի արարք` քննչական մարմնի անգործություն) գործի նախաքննական գաղտնիքները, և ներկայացնում ենք բաց աղբյուրի, այսպես ասած, մայր գործի այն դրվագը, որը հիմք է դարձել (կամ կարող է դառնալ) Թաթուլ Մանասերյանի կողմից վաշխառությամբ զբաղվելու հանգամանքները պարզելու համար:
ՀՀ ոստիկանության Կենտրոնականի քննչական բաժնում անցյալ տարի քննված (ՀԿԳ ավագ քննիչ Հ.Ավագյան) թիվ 13132309 քրեական գործով տուժող Արթուր Մանասերյանի և Ա.-ի առերես հարցաքննության ժամանակ Ա.-ն մանրամասներ է հայտնել իր և Թաթուլ Մանասերյանի միջև եղած գումարային գործարքների մասին. (մեջբերում ենք) «…Խոսքը գնում է այն ապրանքի մասին, որը «X» (անունը փոխված է) ՍՊԸ-ից տրված է եղել Թաթուլ Մանասերյանին իմ ունեցած 40.000 ԱՄՆ դոլար պարտքի դիմաց և գումարած 12.000 ԱՄՆ դոլարի հաշվարկված տոկոսները: Ես 3 ամիս 2006թ. վերջից մինչև 2007թ. սկիզբը ներառյալ մուծել եմ անձամբ Թաթուլ Մանասերյանին 19.450 ԱՄՆ դոլար տոկոս, որը հաշվել է որպես ինձ տրված 40.000 ԱՄՆ դոլար պարտքի դիմաց տոկոս, դրանից հետո չեմ կարողացել մուծել և կուտակվել է վերոհիշյալ 12.000 ԱՄՆ դոլար տոկոսը. նշված 40.000 ԱՄՆ դոլարը ես անձամբ վերցրել էի Թաթուլ Մանասերյանից ամսական 10% հավելավճարով… (Հ.2)»:
Հետագայում` «Ժամանակ» օրաթերթի հիմնադիր «Սկիզբ Մեդիա Կենտրոնի» հասցեով Կենտրոն և Նորք-Մարաշ վարչական շրջանների ընդհանուր իրավասության դատարանից 3 ամիս անց ստացված հայցադիմումից պարզվեց, որ պարոն Մանասերյանն իսկապես վիրավորվել է. հրապարակվածը գնահատել է զրպարտություն, որով արատավորվել է իր պատիվն ու արժանապատվությունը: Դրա դիմաց նա իր կրած վնասը գնահատել է մոտ 2,5 միլիոն դրամ (որից 500.000-ը փաստաբանի վարձատրության գումարն է) և դատարանի միջոցով պահանջում է հերքել վերոնշյալ տեղեկությունները:
Ընդ որում` հետաքրքիր է, որ Կենտրոն և Նորք-Մարաշ վարչական շրջանների ընդհանուր իրավասության դատարանը «Ժամանակ» օրաթերթի հիմնադիր «Սկիզբ Մեդիա Կենտրոն» ՍՊԸ-ի դեմ ներկայացված հայցը վարույթ է ընդունել հոկտեմբերի 1-ին` Թաթուլ Մանասերյանի հերքում-պատասխանը խմբագրություն բերելուց մոտ 20 օր առաջ, հայցի կրկնօրինակը` կից փաստաթղթերով խմբագրություն է հասել դեկտեմբերի 20-ին, իսկ փետրվարի 16-ին հապճեպ նշանակված նախնական դատական նիստին պատասխանող կողմն այդպես էլ չի կարողացել ներկա գտնվել, քանի որ ծանուցագիրը մինչև տեղ է հասել, նախնական դատական նիստն ավարտվել է:
Այժմ հայտնի չէ, թե էլ ինչ անակնկալներ են սպասվում Մանասերյանից, բայց եթե այսպես շարունակվի, չի բացառվում, որ հենց նա հայտնվի այն կարգավիճակում, որում դրել կամ փորձում է դնել «Ժամանակ» օրաթերթին ու նաև այլ անձանց: Բայց հնարավոր է, որ հենց ինքը` պարոն Մանասերյանը, հայտնվի իր փորած «փոսում» և ստիպված լինի վճարել այն կողմի կամ կողմերի կրած այն բոլոր ֆինանսական ծախսերը, որոնք արվել են զրպարտություններից, սուտ մատնությունններից` սեփական անձի պաշտպանությունը կազմակերպելու համար:
Էլմիրա Մարտիրոսյան, «Ժամանակ» օրաթերթ
