Ադրբեջանի նախագահ Իլհամ Ալիեւը երեկ պաշտոնական այցով մեկնել է Ուկրաինա, որտեղ հանդիպել է Ուկրաինայի նախագահ Վիկտոր Յանուկովիչին` վերջինիս կողմից պաշտոնը ստանձնելուց ի վեր առաջին անգամ:
Ինչպես գրում է ռուսաստանյան КОММЕРСАНТ-ը, բանակցությունների ընթացքում առանձնահատուկ արդյունքներ չեն արձանագրվել: Կողմերը միայն հաստատել են երկու երկրների միջեւ առկա բարիդրացիական հարաբերությունները, արդեն որերոդ անգամ կարեւորել Օդեսա-Բրոդի նավթուղին ադրբեջանական նավթով լցնելու գաղափարը, սակայն այդպես էլ հստակ արդյունքներ չեն արձանագրել: Ինչպես եւ սպասվում էր, երեկ նախագահների առաջին հանդիպմանը բանակցություններն ավելի շատ ծանուցողական բնույթ էին կրում: «Յանուկովիչի ու Ալիեւի համար կարեւոր էր համոզել մեկմեկու, որ Կիեւն ու Բաքուն պատրաստ են ռազմավարական գործակցության զարգացմանը` դրա համար ստեղծելով հեռուստատեսային պատկեր», – գրում է թերթը: «Չնայած այն հանգամանքին, որ այցի նախօրեին Ադրբեջանի նախագահի մամլո ծառայությունը հաղորդում էր «տարբեր ասպարեզներում համագործակցության վերաբերյալ մի շարք փաստաթղթերի ստորագրման մասին», այցի ժամանակ այդպես էլ փաստաթղթավորված պայմանավորվածություններ չստորագրվեցին», – գրում է թերթը: Պարոն Ալիեւը, ով վերջին հինգ տարիների ընթացքում հայտարարում էր անհրաժեշտ քանակությամբ նավթով ապահովելու` ադրբեջանական պատրաստակամության մասին, երեկ նորից կրկնեց նույնը եւ այդպես էլ չխոսեց կոնկրետ ժամկետների մասին` երբ է լցվելու Օդեսա-Բրոդի նավթուղին, գրել է թերթը:
REGNUM գործակալությունն իր հերթին անդրադարձել է այն հանգամանքին, որ բանակցություններից հետո հրավիրված մամուլի ասուլիսում կողմերն այդպես էլ չեն խոսել ՎՈՒԱՄ կառույցից, որին երկու երկրներ էլ անդամակցում են: Գործակալությունը, տարօրինակ համարելով այդ փաստը, փորձել է մեկնաբանություն ստանալ ադրբեջանցի քաղաքագետ Ֆիկրետ Սադիխովից: Վերջինս հավաստել է, թե տարօրինակ ոչինչ չկա, քանի որ ՎՈՒԱՄ-ը այլեւս ակտուալ չէ երկու երկրների փոխհարաբերություններում: