Ankara գործակալությունը, վկայակոչելով Բեկլեւիչի խորհրդական Մուրադ Աքսուին, հաղորդել էր, որ «Հզոր Թուրքիա» կուսակցության նախագահ Թունա Բեկլեւիչը Երեւանում ձերբակալվել է։ Այս տեղեկությունը արդեն հայաստանյան գործակալություններին հաստատել է ԱԱԾ-ն: «Քանի որ այսօր ասուլիսի ընթացքում Բեկլեւիչը հայտարարություն է արել, որ հատել է հայ–թուրքական սահմանը, նրան հրավիրել են ԱԱԾ` պարզաբանումներ տալու համար»,– հայտարարել է ԱԱԾ մամուլի քարտուղար Արծվի Բագրամյանը։
Աքսուն հայտարարել է, որ Բեկլեւիչին եւ նրան ուղեկցող պատվիրակության անդամներին ձերբակալել են հայկական հատուկ ծառայությունները` Երեւանում կայացած մամուլի ասուլիսից անմիջապես հետո։ Հոկտեմբերի 10-ին Թունա Բեկլեւիչն ու նրա կուսակիցները, ի նշան հայ-թուրքական փակ սահմանի դեմ բողոքի, հատել էին Թուրքիայի հետ սահմանը և մտել Հայաստան, այդ մասին հայտարարել էր Բեկլեւիչը օրերս նաեւ «Առաջին լրատվականին»: Թուրքական կողմի այդ պնդումները հերքել էր Հայաստանում ՌԴ անվտանգության դաշնային ծառայության սահմանապահ վարչության պետի տեղակալ, գնդապետ Անդրեյ Գուզեեւը։ Սակայն Բեկլեւիչն այսօր Երեւանում կայացած մամուլի ասուլիսում վերահաստատել էր, որ իրենք հատել են սահմանը։