Հայ ազգային կոնգրեսի առանցքային կուսակցություններից մեկի` ՀՀՇ-ի ղեկավար Արամ Մանուկյանը այսօր իր ասուլիսում հայտարարել է, որ մեսիջ է հղում Արևմուտքին: Իսկ մեսիջը եղել է այն միտքը, որ Հայաստանում միայն ժողովրդավարական իշխանությունը կարող է լուծել Ղարաբաղի հարցը, հայ-թուրքական հարաբերությունների հարցը:
Արամ Մանուկյանը հայտարարել է, որ միայն լեգիտիմ իշխանությունը կարող է ինտեգրվել և լուծել տարածաշրջանային այն խնդիրները, որ բարձրացնում է Արևմուտքը և ուզում է լուծել: Կոնգրեսի համար առանցքային այս կուսակցության ղեկավարի հիշյալ հայտարարությունը մի քանի հարցեր է առաջացնում, որոնք բարձրաձայնելը կարծես թե անհրաժեշտություն է՝ դրանց պատասխանը ստանալու իմաստով:
Նախ՝ արդյոք Արամ Մանուկյանի մեսիջը Կոնգրեսի՞, թե՞ ՀՀՇ-ի մեսիջն է Արևմուտքին: Եթե ՀՀՇ-ի մեսիջն է, ապա ինչպե՞ս է դրան վերաբերվում Կոնգրեսը: Եթե Արամ Մանուկյանն ասում է, թե միայն ժողովրդավարական իշխանությունը կլուծի Ղարաբաղի հարցն ու հայ-թուրքական հարցը, որ բարձրացնում է Արևմուտքը, ապա ի՞նչ է պատկերացնում նա լուծում ասելով:
Արդյոք Արամ Մանուկյանի մեսիջը նշանակում է, որ Հայ ազգային կոնգրեսը կամ ՀՀՇ-ն կողմնակի՞ց են լուծման այն տարբերակներին, որ միջնորդ երկրները ներկայացնում են թե՛ Ղարաբաղի, թե՛ հայ-թուրքական հարաբերությունների կարգավորման առումով: Արդյոք այդ առաջարկների հանդեպ ո՞րն է Կոնգրեսի կամ ՀՀՇ պաշտոնական դիրքորոշումը. ինչի՞ հետ են համաձայն և ինչի՞ հետ համաձայն չեն: Արդյոք այն ձևակերպումը, թե ոչ լեգիտիմ իշխանությունը հարցը չի լուծի, իսկ լեգիտիմը կլուծի, չի՞ նշանակում, որ Կոնգրեսը կամ ՀՀՇ-ն պատրաստակամություն են հայտնում ընդունել միջնորդների ներկայիս առաջարկներն ու ապահովել դրանց հանրային լեգիտիմությունը:
Բանն այն է, որ Արևմուտքին այդպիսի մեսիջ հղելու մասին հայտարարությունը աներկբայորեն պետք է ուղեկցվի դրա առաջ բերած «հարցաշարի» պարզաբանումներով, ընդ որում՝ հանգամանալից պարզաբանումներով: Ավելին, մենք հեռու ենք կարծելուց, թե ձևակերպում ենք բոլոր հնարավոր հարցերը, որ առաջանում են ՀՀՇ նախագահի հայտարարությունից հետո:
Հասարակության տարբեր շրջանակներ կարող են շատ այլ, այդ թվում՝ շատ ավելի սուր հարցադրումներ ներկայացնել: Մինչդեռ խնդիրը չափազանց կարևոր է, և եթե բանը հասել է Արևմուտքին այդպիսի մեսիջներ հղելուն, հարց է առաջանում՝ իսկ ի՞նչ մեսիջ են հղում հասարակությանը Կոնգրեսն ու ՀՀՇ-ն: