Փետրվարի 22-ին Վաշինգտոնում ՀՀ դեսպանության ընդունելությունների սրահում տեղի ունեցավ միջոցառում` նվիրված ԱՄՆ Ներկայացուցիչների պալատի անդամ, ԱՄՆ Ներկայացուցիչների պալատի հայանպաստ խմբի հիմնադիր համանախագահ Ֆրենկ Փըլոնի գործունեության 15-ամյա տարելիցին, ինչի առիթով նրան հանձնվեց ՀՀ Նախագահ Սերժ Սարգսյանի կողմից շնորհված Պատվո շքանշանը:
Դեսպան Մարգարյանն իր ողջույնի ելույթում, մասնավորապես, նշեց, որ ՀՀ Նախագահի կողմից շնորհված բարձր պարգևը կոնգրեսական Ֆրենկ Փըլոնի
15-ամյա անձնվեր աշխատանքի գնահատանքի արտահայտությունն է` ի շահ հայ-ամերիկյան բարեկամության ամրապնդման գործում ունեցած նշանակալի ավանդի, ԱՄՆ Կոնգրեսում հետևողական հայանպաստ գործունեության և հայ ժողովրդի խնդիրները միջազգային հանրությանն անաչառ ներկայացնելու: Այս բարձր շքանշանը արտահայտում է նաև ամերիկահայության վերաբերմունքը` հանդեպ կոնգրեսականի և նրա 15-ամյա վաստակի:
Այնուհետև կոնգրեսական Փըլոնին ողջունեցին և շնորհավորանքի խոսքեր ուղղեցին ԱՄՆ-ում ԼՂ ներկայացուցիչը, ԱՄՆ Հայ Դատի և Ամերիկայի հայկական համագումարի գործադիր տնօրենները:
Վերջում հանդես եկավ կոնգրեսական Փըլոնը և երախտագիտության խոսքն ուղղեց ՀՀ Նախագահին իր գործունեության բարձր գնահատականի համար: Կոնգրեսականը նաև իր շնորհակալական խոսքն ուղղեց ԱՄՆ-ում ՀՀ դեսպանին, ինչպես նաև ամերիկահայ կազմակերպությունների ղեկավարներին դրվատանքի խոսքերի և տարիների սերտ համագործակցության համար: Նա հայտարարեց, որ առաջիկայում նույնպես ինքը շարունակելու է իր ակտիվ գործունեությունը Հայաստանի Հանրապետությանը, ԼեռնայինՂարաբաղին և հայ ժողովրդին հուզող հարցերում հաջողության հասնելու համար:
