Արդյո՞ք կոռեկտ էր Լ. Զուրաբյանի կողմից ընտրված պահը` հայտարարելու, թե «սերունդները մեզ չեն ների, եթե Հայաստանում ժողովրդավարություն հաստատենք Ղարաբաղի գնով»: Արդյո՞ք սա ժողովրդավարության համար պայքարող զանգվածների գլխին սառը ցնցուղ լցնել չէր նշանակում:
Այս հարցն այսօր «Առաջին լրատվականը» ուղղեց ԱԺ «Ժառանգություն» խմբակցության պատգամավոր Արմեն Մարտիրոսյանին: «Ես չեմ մեկնաբանի Լևոն Զուրաբյանի ասածները: Միայն կասեմ, որ չեմ կարծում, թե ՀՀ-ում լինի որևէ մարդ, որը ցանկանա ԼՂ-ի գնով ինչ-որ բան անել»,- ասաց Ա. Մարտիրոսյանը:
Ըստ նրա՝ իրականում հենց ժողովրդավարական զարգացումների առումով դրական փոփոխություններն են, որ նպաստելու են ԼՂ-ի պահպանմանը:
«Մենք ԼՂ-ն ձեռք բերեցինք, երբ ՀՀ-ն համարվում էր ժողովրդավարության կղզյակ տարածաշրջանում: Եվ մենք ԼՂ-ն կարող ենք պահպանել ու պաշտպանել միայն այն ժամանակ, երբ ՀՀ-ն կվերականգնի ժողովրդավարության կղզյակի իր համբավը»,- հայտարարեց Ա. Մարտիրոսյանը:
Նրա խոսքով, այն գործընթացները, որոնք այսօր տեղի են ունենում, արդեն իսկ ԼՂ-ն կորցնելու գործընթացներ են:
