ԱՄՆ պետքարտուղար Հիլարի Քլինթոնը երեկ հայտարարել է, որ ամերիկյան իշխանությունները գիտեն, թե ինչպես ստիպել Լիբիային դադարեցնել բռնությունները խաղաղ բնակչության նկատմամբ, որը դուրս է եկել փողոց քաղաքական փոփոխությունների համար: Քլինթոնի` Վաշինգտոնում կայացած մամուլի ասուլիսի մասին հաղորդել է Reuters գործակալությունը:
«Մենք կմտածենք, թե ինչպես կարելի է վերջ դնել բռնությանը և ազդել լիբիական իշխանությունների վրա», ասել է ԱՄՆ պետքարտուղարը:
Միաժամանակ Քլինթոնը նշել է, որ այդօրինակ հարցերի լուծման ժամանակ կարևորվելու է հատկապես ամերիկյան քաղաքացիների անվտանգության հարցը, որոնք գտնվում են տարածաշրջանում:
Սպիտակ տան մամուլի խոսնակ Ջեյ Քերնեյն իր հերթին ասել է, որ Միացյալ Նահանգների նախագահ Բարաք Օբաման խստորեն դատապարտում է ստեղծված իրավիճակը Լիբիայում, իսկ ամերիկյան իշխանությունները սերտ համագործակցում են ՄԱԿ-ի հետ` բռնություններին համապատասխան արձագանք տալու համար: