Տնտեսական մրցակցության պաշտպանության պետական հանձնաժողովի մամուլի քարտուղար Նելլի Դանիելյանը, արձագանքելով մեր այն հրապարակմանը, որ այսօր արդեն մի շարք խանութներում շաքարավազը վաճառվում է 450 դրամով, նշեց.
«Մեր այսօրվա մոնիտորինգը ցույց է տվել, որ «Երևան Սիթիում» շաքարավազը վաճառվում է մանրածախ գնով` 345 դրամով։ Քանի որ այս սուպերմարկետների ցանցը համարվում է նաև ներկրողի խանութ, մենք մոնիտորինգի հարցում առաջնորդվում ենք այդ ցանցերի գներով։ Այս սուպերմարկետների ցանցում շաքարավազը նաև ազատ վաճառքի է դրված։ Հետևաբար հանձնաժողովը չի գտնում, որ ներկրողը չարաշահումներ է թույլ տալիս»։
Իսկ մանր ու միջին խանութներում հանձնաժողովը մոնիտորինգ չի իրականացնում։
Նշենք, որ ինչպես իր բոլոր գործերում, այստեղ ևս Սամվել Ալեքսանյանը մեծ խորամանկության է դիմել. նա պահեստներից մանր ու միջին սեփականատերերին շաքարավազ նախկինի պես չի մատակարարում, փոխարենն առաջարկում է, որ նրանք շաքարավազը ձեռք բերեն «Երևան Սիթի» խանութների ցանցից։ Ստացվում է, որ եթե նախկինում մանր ու միջին խանութի սեփականատերը պահեստից անհամեմատ ցածր գնով էր շաքարավազը ձեռք բերում, ապա այսօր ստիպված է «Սիթիի» գներով ձեռք բերել և ավելի թանկ գնով վաճառել, որ կարողանա շահույթ ապահովել։ Այս պարագայում ստացվում է, որ սպառողները, բնականաբար, ստիպված իրենց գնումները կկատարեն միայն «Սիթիների» ցանցից, և կգա մի օր, որ բացի «Երևան Սիթի» խանութների ցանցից, էլ ոչ մի խանութում շաքարավազ չի վաճառվի։
Որոշ աղբյուրներ նշում են, որ Սամվել Ալեքսանյանը այնքան է տխրել սպառողների գնողունակության անկումից, որ ցանկանում է այն 30-50 դրամը, որ վաստակում էին մանր ու միջին խանութների տերերն իր ներկրած շաքարի հաշվին, ևս փոխադրել իր գրպան։
Հիշեցնենք, որ Նոր տարվա նախօրեին Սամվել Ալեքսանյանն իր ներկրած հնդկահավերը մյուս խանութներին վաճառեց 1300 դրամով, որից հետո իր ցանցում, խախտելով նախնական պայմանավորվածությունը, վաճառեց 1100 դրամով։ Արդյունքում` Սամվել Ալեքսանյանի հնդկահավերը սպառվեցին, իսկ մյուսներինը, կոպիտ ասած, տանը մնացին։
