Արմավիր և Մեծամոր քաղաքներում, ինչպես նաև 10 գյուղական համայնքներում, չնայած շուրջօրյա ջրամատակարարմանը, սպառողները խմելու ջուրը գնում են ջրաբաժան մեքենաներից: Մոտ 5 տարի է` ջրբաժան մեքենաները հատուկ ժամերի շրջում են: Վարորդները միմյանց չեն խանգարում, ամեն ոք ունի իր թաղամասը:
«Ծորակներից եկող ջուրը խմելու չէ. կրկնակի ենք վճարում, հա՛մ ջրամատակարարին ենք փող տալիս, հա՛մ ջուր ենք գնում, ու ոչ ոք կարծես չի ուզում մտածել մեր մասին»,-ասում են բնակիչները:
Ջրամատակարար «Նոր Ակունք» ՓԲԸ-ի գլխավոր տնօրենի տեղակալ Արտավազդ Թորոսյանն այլ կարծիքի է: Ասում է, որ մեծ ջանք են թափել շուրջօրյա ջրամատակարարում ապահովելու համար: Նույնիսկ հիշում է, որ մի քանի տարի առաջ արմավիրցիները երազում էին ծորակից ջուր վերցնել, իսկ հիմա 24 ժամ շարունակ ջուր ունեն:
«Մենք մատակարարում ենք խմելու համար պիտանի որակյալ ջուր, նույնիսկ ես ու իմ ընտանիքի անդամներն են այդ ջրից խմում: Չեմ հասկանում ջրբաժան մեքենաներից ջուր գնելու իմաստը»,- ասում է պարոն Թորոսյանը:
Ամեն դեպքում սպառողները համոզված են, որ ծորակից եկող վարակազերծված ջուրը վտանագվոր է առողջությանը: Թե երբ նրանք կդադարեն ջուր գնելուց, պարզ չէ:
Ի դեպ, ջուր վաճառող վարորդներն ասում են, որ «Թալինի ջուր են վաճառում»: Այդ ջուրը և՛ փափուկ է, և՛ համեղ, և՛ առողջարար: