«Դա, իհարկե, նախկին դեսպանի պատասխանելու խնդիրն է, քանզի ես ընդամենը 4 ամիս է, ինչ դեսպան եմ Հայաստանում»,- «Առաջին լրատվականի» հետ զրույցում ասաց Հայաստանում Ուկրաինայի դեսպան Իվան Կուխտան` անդրադառնալով WikiLeaks-ում հրապարակված տեղեկատվությանը:
Հիշեցնենք, որ WikiLeaks-ում հրապարակված տեղեկատվության համաձայն` 2008թ. Հայաստանի ԱԳՆ է կանչվել Հայաստանում Ուկրաինայի դեսպան Ալեքսանդր Բոժկոն և նրան հորդորել են Հոլոդոմորի դեպքերի հիշատակին նվիրված որևէ արարողություն չանել, քանզի այդ ժամանակ Հայաստանում է գտնվել Ռուսաստանի նախագահը:
Կուխտան նշեց, որ ինքը` որպես դիվանագետ, փորձում է հավատալ միայն պաշտոնական աղբյուրներին: Նա նաև նշեց, որ այս տարի Երևանում ուկրաինական սփյուռքի հետ նրանք այդ օրը նշել են, որին ներկա է եղել անգամ Սերժ Սարգսյանի աշխատակազմի ներկայացուցիչը:
Հարցին, թե ինչպես է վերաբերվում այն հանգամանքին, որ Հայաստանի կառավարությունը չի ճանաչել Հոլոդոմորի դեպքերը, Կուխտան պատասխանեց. «Հայաստանի և Ուկրաինայի միջև առկա երկկողմ հարաբերությունները շատ արդյունավետ զարգանում են: Ես կարծում եմ` կգա ժամանակը և այդ հարցը ևս կվերանայվի`ստանալով արժանի գնահատական»:
