«Եթե ես վստահ լինեի, որ այդ բարեփոխումները իրականացնողն իշխանություն է, գուցե ես կոալիցիայի մեջ լինեի: Բայց վստահ եմ, որ շատ քիչ հավանականություն կա, թե այս որդեգրած քաղաքական կուրսով մենք նման բարեփոխումները կարող ենք հաջող ավարտի հասցնել: Ցավոք, ես թերահավատ եմ»,- անդրադառնալով Արևելյան գործընկերության շրջանակներում Հայաստանի ստանձնած բարեփոխումների իրականացմանը՝ կարծիք հայտնեց ԱԺ ՀՅԴ խմբակցության ղեկավար, Եվրանեստում հայաստանյան պատվիրակության ղեկավար Վահան Հովհաննիսյանը:
Հարցին, թե իշխանությունների՝ բարեփոխումներ իրականացնելու պատրաստակամության հարցում թերահավատ լինելով՝ ինչո՞ւ է ստանձնել Արևելյան գործընկերության ձևաչափի Եվրանեստ խորհրդարանական վեհաժողովում պատվիրակության ղեկավարի պաշտոնը, Հովհաննիսյանը պատասխանեց.
«Եթե Հայաստանի դեմ որևէ երկիր ոտնձգություն սանձազերծի, չպաշտպանե՞նք մեր երկիրը միայն նրա համար, որ իշխանությունը լավը չէ: Սերը հայրենիքի հանդեպ և սերը կառավարության հանդեպ տարբեր բաներ են: Կարող ես չսիրել քո կառավարաությունը, բայց հայրենիքդ սիրել պարտավոր ես»:
Հովհաննիսյանը նշեց, որ հարկավոր է մեր բարեփոխումների մեջ ազնիվ լինել, ոչ թե իմիտացիա անել, որպեսզի ավելի անխոցելի լինենք Եվրանեստում.
«Երբ դու հայտնվում ես մի կազմակերպության մեջ, որի նպատակը դեմոկրատական բարեփոխումներն են, կա՛մ պետք է իսկապես իրականացնես այդ բարեփոխումները, կա՛մ փորձես իմիտացիոն գործողություններով դրա տպավորությունը թողնել, բայց կույր մարդիկ չեն մնացել նույնիսկ պառլամենտական վեհաժողովներում, և խաբել չի հաջողվի»:
