Արդեն տեղեկացրել ենք, որ փետրվարի 20-ին՝ ժամը 19.30-ին, Վանաձոր քաղաքի Տիգրան Մեծի 9/1 հասցեում գտնվող բնակարանում հայտնաբերվել է նույն տան բնակիչ Սերյոժա Վազգենի Ղուբաթյանի դիակը՝ բռնի մահվան հետքերով։ Դեպքի առթիվ հարուցվել է քրեական գործ ՀՀ քր. օր.-ի 104 հոդվածի 1-ին մասով։ Ս. Ղուբաթյանին սպանել է որդին՝ Տիգրան Գյուլբանկյանը։
Վերջինս հաշվառված է Լոռու մարզի նյարդահոգեբուժական դիսպանսերում։ «Առաջին լրատվականը» պարզել է, որ 21-ամյա Տիգրանը ընտանիքի միակ երեխան է։ Ծայրահեղ սոցիալական պայմաններում ապրող ընտանիքում ոչ մեկը չի աշխատում։ Տանտերը՝ Ս. Ղուբաթյանը, ամեն օր խմած էր տուն գալիս ու վիճաբանությունների տեղիք տալիս։ Շատ հաճախ հարևաններն էին միջամտում, որ վերջ տրվի «տուրուդմբոցին»։
Հարևանների պատմելով՝ սպանվածը ամեն օր ծեծում էր կնոջն ու երեխային։ Տիգրանը հոր հետ համարյա չէր շփվում, մոր հանդեպ էր ուշադիր։ Վերջինիս վիրահատելուց հետո մորը Տիգրանն էր խնամում։
Հարևանների պատմելով՝ Տիգրանը ամաչկոտ էր, ընկճված էր հոր պատճառով։ Տնից հազվադեպ էր դուրս գալիս, գիրք էր կարդում, դպրոցում ուշիմ աշակերտ էր։ Սպանության օրը հարևանները տեսել են, որ Սերգեյը էլի հարբած տուն է գալիս։ Մի քանի ժամ հետո նրա կինը՝ Անահիտը, հարևանի տնից զանգում է շտապ օգնություն՝ ասելով, թե մարդ է մահացել։ Երբ հարևանները մտել են նրանց տուն, Տիգրանը դողէրոցքի մեջ թախտին պառկած է եղել։
«Տիգրանը կցկտուր ասում էր, որ հայրը հարձակվել է իր վրա, հետո չի հիշում, թե ինչ է կատարվել։ Անահիտն էլ պատմում էր՝ «ընկած խեղդում էր էրեխուս, տապորը հանել էր պադվալից, որ տապորով խփի»։ Դե, երևի պաշտպանվել է Տիգրանը»,- կարծում են հարևանները։
Տիգրանի հիվանդության մասին հարևանները ոչինչ չգիտեին։ Բանակ պիտի տանեին, և նույնիսկ ուրախացել էին, որ 2 տարի Տիգրանը կսնվի ու հեռու կլինի ընտանեկան բռնությունից։ Տիգրանին հարևանները չեն մեղադրում, բայց, ամեն դեպքում, վերջին խոսքը իրավապահներինն է։