Արևելյան գործընկերության ձևաչափի Եվրանեստ խորհրդարանական վեհաժողովի հիմնադիր նիստը կայանալու է մարտին Բրյուսելում` Եվրախորհրդարանի շենքում: Եվրանեստում հայաստանյան պատվիրակության ղեկավար, ՀՀ ԱԺ ՀՅԴ խմբակցության անդամ Վահան Հովհաննիսյանը, որը նոր է վերադարձել Եվրանեստում կայացած աշխատանքային խորհրդակցությունից, նշեց, որ Եվրանեստը կարող է կարևորագույն հարթակ լինել Հայաստանի համար:
Նա նշեց, որ Եվրանեստի նիստերին մասնակցելը կարևոր է, ինչպես նաև անհրաժեշտ է, որպեսզի հայաստանյան իշխանությունները իրականացնեն այն բարեփոխումները, որոնք կան Արևելյան գործընկերության շրջանակներում, հակառակ դեպքում, ըստ բանախոսի, Եվրանեստը կլինի բեմ, որտեղ Հայաստանին կքննադատեն բոլոր գործած և չգործած մեղքերի համար:
Վահան Հովհաննիսյանը տեղեկացրեց, որ Եվրանեստում հայաստանյան պատվիրակությունը բաղկացած է 10 հիմնական անդամից և 5 փոխարինողից, ներկայացված են բոլոր խմբակցությունները:Եվրանեստում որոշումները կայացվում են ձայների 2/3 հարաբերակցությամբ, սակայն անդամ երկրները հնարավորություն ունեն քվեարկությունից հանել այն հարցերը, որոնք վերաբերում են երկրի կարևորագույն խնդիրներին:
«Սա վետոյի նման մի բան է և լավ է նրանով, որ մեզ համար հիմնական, կարևորագույն խնդիր հանդիսացող հարցերի քննարկման դեպքում ձայներով չխեղդեն»,- պարզաբանեց Հովհաննիսյանը:
Ի դեպ, Եվրանեստի ժամանակ պատգամավորները նստելու են ոչ թե իրենց պատվիրակություններով, այլ՝ ըստ այբբենական կարգի: Վահան Հովհաննիսյանը ասաց, որ սա, իհարկե, կբարդացնի աշխատանքի կոորդինացումը, «սակայն մի բան կանենք»:
