ՀՀԿ խմբակցության պատգամավոր Հովհաննես Սահակյանը չի բացառում, որ կոալիցիոն կուսակցությունները ԱԺ ընտրություններին մասնակցեն միասնական ցուցակով:
Այնուամենայնիվ, մեզ հետ զրույցում նա նշեց, թե ՀՀԿ խորհրդում այս հարցը չի քննարկվել, և քանի դեռ մեկ տարուց ավելի ժամանակ կա ԱԺ ընտրություններին, այդ հարցը վաղաժամ է քննարկելը: Նա նույնիսկ ասաց, թե մեկ տարին բավական մեծ ժամանակ է, որպեսզի կուսակցությունները նման որոշում կայացնեն:
ՀՀԿ-ական պատգամավորը նման հայտարարություն է անում այն դեպքում, երբ ավելի քան երկու տարի կա նախագահի ընտրություններին, ու արդեն իսկ կոալիցիոն գործընկերներին ստիպել են ստորագրել Ս.Սարգսյանին հաջորդ ընտրություններում ևս սատարելու մասին հուշագիրը:
«Այնուամենայնիվ, չեմ բացառում, որ ԱԺ ընտրություններին մասնակցենք միասնական ցուցակով: Այդ քայլին կգնանք՝ կախված քաղաքական իրավիճակից, հասարակական պահանջից»,- ասաց Սահակյանը:
Իսկ թե ինչ պետք է լինի, որ կոալիցիոն կուսակցությունները միասնական ցուցակ կազմեն, Սահակյանը դժվարացավ հստակ մատնանշել: