Այսօր Ամերիկյան համալսարանում ներկայացվել է «Քաղաքացիական հասարակության ինդեքս. Հայաստան» զեկույցը: Շնորհանդեսին ներկա էին հետազոտությունը անցկացրած պետական և հասարակական կազմակերպության ներկայացուցիչները, ինչպես նաև ԱՄՆ դեսպան Մարի Յովանովիչը և ԵԱՀԿ երևանյան գրասենյակի ղեկավար Սերգեյ Կապինոսը:
«Քաունթերփարթ ինթերնեշնլ»-ի փոխնախագահ Ալեք Սարդարի խոսքով, քաղաքացիական հասարակության ինդեքսը` CIVICUS կազմակերպության կողմից թույլատրվող ազգային կազմակերպությունների հետազոտական գործիքն է, որը Հայաստանում արդեն երկրորդ անգամ է իրականացվում. այս անգամ քաղաքացիական հասարակության ինդեքսն ուսումնասիրել է ոչ միայն ՀԿ սեկտորի, այլ նաև քաղաքացիական հասարակության իրավիճակը, դրա ուժեղ և թույլ կողմերը`փորձելով հասկանալ` ինչպես կարելի է բարելավել քաղաքացիական հասարակության իրավիճակը օրենսդրորեն և մշակութաբանորեն:
«Հայաստանում քաղաքացիական հասարակությունը զարգացման փուլում է, ունի շատ մեծ մարտահրավերներ, բացի այդ, ինքը` ՀԿ դաշտը, վերադասավորման, վերաիմաստավորման խնդիր ունի»,-ասաց Ալեք Սարդարը:
ԱՄՆ դեսպան Յովանովիչի խոսքով, պետք է գիտակցել, որ շատ կարևոր է քաղաքացիական հասարակության ձևավորումը երկրի ժողովրդավարացման համար: «Սեփական կառավարությանը քննադատելը ամենամեծ հայրենասիրությունն է»,- իր խոսքում շեշտեց դեսպանը:
Անդրադառնալով բուն զեկույցին` Յովանովիչն ասաց, որ դրա հրապարակումը շատ կարևոր է, քանի որ այն իրենից ներկայացնում է ՀԿ-ների, միջազգային կազմակերպությունների, պետական կառույցների կողմից անցկացված լայնածավալ հետզոտությունների արդյունքը:
«Երեկ իր ելույթում պետքարտուղարը ևս կարևորել է և ԱՄՆ-ի աջակցություն է հայտնել քաղաքացիական հասարակության զարգացմանը հատկապես ժողովրդավարության ճանապարհին գտնվող երկրներում, այդ թվում` նաև Հայաստանում»:
Զեկույցի արդյունքները, ըստ Յովանովիչի, ցույց են տալիս, որ Հայաստանում քաղաքացիական հասարակության զարգացմանը խոչընդոտում է այն, որ ՀԿ-ները քիչ թվով անդամներ ունեն.
«Սա ազդում է կազմակերպության արդյունավետության վրա: Նրանք խոսում են հասարակության անունից, ուստի պետք է իրոք ներկայացնեն հասարակության մեծ մասի կարծիքը»:
ԵԱՀԿ դեսպան Սերգեյ Կապինոսը ևս ողջունեց զեկույցի հրապարակումը և հույս հայտնեց, որ այն ոչ միայն ուշադրության կարժանանա, այլև կօգտագործվի քաղաքացիական հասարակության զարգացման համար:
«ԵԱՀԿ-ն անվտանգություն ապահովող կազմակերպություն է և գործում է ոչ միայն ռազմական անվտանգության ոլորտում, այլև հասարակական գործունեության անվտանգությունը ապահովելու համար, ինչը պակաս կարևոր չէ ժողովրդավարության, քաղաքական կայունության և միջազգային հարաբերությունների համար»,- իր խոսքում մատնանշեց ԵԱՀԿ դեսպանը:
Պարոն Կապինոսի դիտարկմամբ, զեկույցն ունի մեկ կարևոր թերություն, այն չի ընձեռում հնարավորություն համեմատելու տարբեր երկրների քաղաքացիական հասարակության ինդեքսները.
«Ցավոք, ԱՊՀ երկրների ինդեքսները հասանելի չեն: Այնինչ երկրների ցուցանիշն իմանալը շատ օգտակար կլիներ` համեմատական վերլուծություն անցկացնելու համար: Իսկ համեմատությունը կտար շատ հարցերի պատասխանները, ինչպես օրինակ, ինչո՞ւ որոշ երկրներում կան ՀԿ-ների գործունեության սահմանափակումներ, ինչո՞ւ որոշ երկրներում ՀԿ-ները բարձր վարկանիշ ունեն, որոշ երկրներում` ոչ, և այլն»: