WBO վարկածով երկրորդ միջին քաշային կարգում աշխարհի նախկին չեմպիոն Ռոբերտ Շտիգլիցի գլխավոր մարզիչ Դիրկ Ձեմսկին խոստովանել է, որ Արթուր Աբրահամն արժանի հաղթանակ է տարել իր սանի նկատմամբ:
Հիշեցնենք, որ մարզիկների միջև մենամարտը կայացավ երեկ` Բեռլինի O2 արենայում, և մրցավարների միաձայն որոշմամբ ավարտվեց Արթուրի հաղթանակով (116-112, 116-112, 115-113):
«Շնորհավորում եմ Արթուրին՝ հաղթանակի կապակցությամբ: Կարծում եմ, որ Աբրահամն արժանի հաղթանակ է տարել: Սկսած 4-րդ ռաունդից նա մեծ առավելություն ուներ ռաունդների վերջնամասում:
Ռոբերտը վնասվածք ստացավ մենամարտի մեկնարկում, իսկ 6-7-րդ ռաունդներում ընդհանրապես մեկ աչքով էր տեսնում: Այնուամենայնիվ, նա չէր ցանկանում կորցնել տիտղոսն ու ամեն ինչ անում էր մենամարտը փրկելու համար»,- հայտարարել է մարզիչը: