Ուսանողներն այսօր պաշտպանության նախարար Սեյրան Օհանյանի հետ հանդիպման ժամանակ նշեցին, որ տարկետման իրավունքը կառավարության որոշմամբ աստիճանաբար նվազում է։ Այնինչ վերջերս պաշտպանության նախկին փոխնախարար Արթուր Աղաբեկյանի որդին տարկետման իրավունք ստացավ և ազատվեց բանակից։
Արձագանքելով այս հարցապնդմանը` Սեյրան Օհանյանը նկատեց, որ թե՛ իր հետ, թե՛ մամուլի հետ զրույցներում Արթուր Աղաբեկյանը նշել է, որ իր որդին ծառայելու է։ Նախարարը, անդրադառնալով պարտադիր զինծառայության մասին հարցերից մեկին, նշեց, որ իր երկու տղաներից մեկը ծառայում է և սպա է։ Մյուսը համալսարանի 1-ին կուրսից գնացել, ծառայել է և հետ է վերադարձել։ Անցյալ տարի ավարտել է բակալավրիատը և այս տարի նորից մտել է զինված ուժեր` ծառայելու որպես սպա։
«Ես գտնում եմ, որ բոլորը պետք է ծառայեն հայրենիքին։ Նժդեհն ասում է, որ այն ժողովուրդը, որի զավակները հավասար չեն օրենքի և մահվան առջև, չունի ապագան։ Այսինքն` բոլորը պետք է հավասար լինեն»,- լրացրեց նախարարը։
Նախարարը նաև արձանագրեց, որ այսօր Ադրբեջանը մեզ փորձում է մտցնել սպառազինությունների մրցավազքի մեջ։
«Եվ մենք ամեն ինչ անում ենք. 2010թ.-ը մեզ համար աննախադեպ էր սպառազինության և ռազմական տեխնիկայի ձեռքբերման համար, 2011-ին մեր ձեռքբերումները չեն զիջի նախորդ տարուն, բայց այնուամենայնիվ, մենք փորձում ենք մեր ուժերը կենտրոնացնել ավելի շատ որակական չափանիշների և մարտական ոգու ձևավորման ուղղությամբ»,- ընդգծեց նախարարը։
Սեյրան Օհանյանը հիշեց նաև Գարեգին Նժդեհի այն խոսքերը, որը վերաբերում է կատարյալ հրամանատարին. Ըստ այդմ, կատարյալ հրամանատարը նա է, ով մարտը վարում է մարտի մասին իր ունեցած պատկերացումների, իր աշխարհագրական դիրքի և իր հնարավորությունների շրջանակներում. «Այսինքն` և՛ մեր, և՛ դրսի փորձը պետք է համադրենք մեր զինած ուժերի ապագան կառուցելու համար»։