Գլենդելի բնակիչ, 29-ամյա Ալեն Սողոմոնյանը, որին ձերբակալել են Լոս Անջելեսի միջազգային օդանավակայանում Հայաստանից վերադառնալիս, իրեն մեղավոր չի ճանաչել առաջադրված գողության և թմրանյութի պահման մեղադրանքներով: Այս մասին հայտնում է Glendale News-Press-ը:
Լոս Անջելեսի Գերագույն դատարանի տվյալներով` Սողոմոնյանին ձերբակալել են կիրակի: Նրա դեմ գողության, թմրանյութի պահման մեղադրանքներ էին առաջադրվել դեռևս 2009-ի աշնանը:
Այդ ժամանակ ականատեսները ոստիկաններին հայտնել էին, որ Golden State մայրուղում մի վարորդ խելագար կերպով է վարում մեքենան, նույնիսկ երկու անգամ բախվել է պատին: Ավելի ուշ ոստիկանները նրա BMW մակնիշի մեքենան կայանատեղում գտել էին վնասված:
Ոստիկանները պահանջել էին, որպեսզի նա դուրս գա մեքենայից: Վերջինս նյարդայնությունից սկսել էր կծոտել շրթունքներն ու սարսափելի քրտնել էր: Նա ոստիկաններին հայտնել էր, որ իրեն նյարդային է պահում, քանի որ վթարի է ենթարկվել: Իրավապահների այն հարցին, թե մեքենայում կասկածելի իր կա՞, նա բացասական էր պատասխանել ու փախուստի դիմել:
Կարճատև հետապնդումից հետո նրան ձերբակալել էին: Մեքենայի խուզարկությամբ այնտեղից հերոինի 3 փաթեթ էին հայտնաբերել, ինչպես նաև գողացված սոցիալական ապահովագրության և կրեդիտ քարտեր:
Նշենք, որ 2003 թվականին Սողոմոնյանը դատապարտված է եղել սպառնալիքների և առևանգման համար:
