Այսօր, շարունակելով ավանդույթը, պաշտպանության նախարար Սեյրան Օհանյանը հանդիպեց ԵՊՀ ուսանողների և պրոֆեսորադասախոսական կազմի հետ: Նախարարը իր խոսքում նշեց, թե ուրախ է ավանդույթ դարձած հանդիպման համար, հատկապես այն դեպքում, որ հերթական հանդիպումը տեղի է ունենում բանակի 19-րդ ամյակի շրջանակներում: Նա իր խոսքի ընթացքում կարևորեց ՊՆ համագործակցությունը տարբեր գերատեսչությունների հետ և նշեց, որ այսօր անվտանգության ողջ համակարգում լուրջ փոփոխություններ են իրականացվում: Նա գերատեսչություններից առանձնացրեց հատկապես կրթության և գիտության նախարարության հետ կապը՝ նկատելով, որ բանակը պետք է համագործակցի բոլոր այն գերատեսչությունների հետ, որոնք համալրելու են բանակը: «Այսօր այստեղ եմ ոչ միայն հայրենասիրություն սերմանելու համար, քանի որ համոզված եմ՝ վտանգի դեպքում առաջին շարքերում մեզ հետ պաշտպանելու եք հայրենիքը։ Հետևաբար կխոսեմ բանակի բարեփոխումների և անվտանգության պաշտպանության եղանակների մասին»,-ասաց նախարարը և ուսանողներին ներկայացրեց, թե ինչպես կառուցվեց բանակը մեզ պարտադրված պատերազմի տարիներին:
