Հարավային Կովկասում ԵՄ հատուկ ներկայացուցիչ Փիթեր Սեմնեբին Թբիլիսիում ունեցած ասուլիսի ժամանակ հայտարարել է, որ ռուս-վրացական հարաբերությունները հնարավոր է կարգավորել խաղաղ ճանապարհով,- տեղեկացնում է Грузия-online-ը:
«Տարածաշրջանում կայունության հանգեցնող միակ ուղին երկխոսությունն է: Այս առումով միայն ողջունել կարելի է Վրաստանի նախագահի` ռուսական ղեկավարության հետ բանակցություններ սկսելու պատրաստակամությունը»,- ասել է Սեմնեբին:
Նա շեշտել է, որ երկխոսություն պետք է լինի նաև վրացիների և աբխազների ու օսերի միջև, քանի որ հակամարտության կարգավորման այլ ուղի ուղղակի չկա:
Անդրադառնալով Վրաստանի ներքին խնդիրներին՝ Սեմնեբին ասել է, որ, չնայած վերջին հինգ տարիների լուրջ դժվարություններին, Վրաստանը կարողացել է գալ «առողջ դիրքի» և ունի ժողովրդավարական զարգացման հեռանկարներ: Նա միևնույն ժամանակ կոչ է արել իշխանություններին բարեփոխումներ կատարել ընտրական համակարգում:
Նշենք, որ փետրվարի 28-ին լրանում է Հարավային Կովկասում ԵՄ հատուկ ներկայացուցիչ Փիթեր Սեմնեբիի պաշտոնավարման 5-ամյա ժամկետը։