Երեկ ուշ երեկոյան Երեւանի «Արմենիա Մարիոթ» հյուրանոցի մոտ մի քանի երիտասարդ մոտեցել են ռուսաստանցի գործարար Արամ Քոչարյանին, ով Հայաստանում մի շարք ձեռնարկություններ ունի`մասնավորապես շշի արտադրության գործարան, և ասել են, որ մի քանի հոգի ուզում են տեսնել նրան:
Արամ Քոչարյանին նստեցրել են ավտոմեքենա և տարել մի վայր, որտեղ նրան են սպասելիս եղել հայաստանցի հայտնի «օրենքով գողեր» Զապը և Օշականցի Գևորիկը, ինչպես նաև Գևորիկի եղբայր Հայկը:
Քրեական աշխարհի պարագլուխները պահանջել են Արամ Քոչարյանից իրենց փոխանցել նրա սեփականությունը հանդիսացող որոշ ձեռնարկություններ` այդ թվում Հայաստանում նրան պատկանող շշի արտադրության գործարանը` դրա համար տալով շատ քիչ ժամանակ: Մեր աղբյուրները հայտնում են, որ «բանակցությունները» դեռ շարունակվում են։
Հիշեցնենք, որ ««Զապ» մականունով Անդրանիկ Սողոյանը ծնվել է 1958-ին, Գյումրիում:
1999-ին Սողոյանը ապրել է Մոսկվայում, հետո տեղափոխվել Սոչի, որտեղ էլ ապրել է մինչև 2006-ը: Այդ ժամանակ նրա մոտ հայտնաբերվել է կեղծ անձնագիր, ինչից հետո նրան հետ են ուղարկել Հայաստան՝ 5 տարով արգելելով այլևս մուտք գործել Ռուսաստան:
Դրանից հետո, օպերատիվ տվյալների համաձայն, 2007-ին, օգտագործելով իր կապերը, նա մուտք է գործել Պրահա, ապա ձերբակալվել է 2007-ի նոյեմբերին իր հայրենակից գործարարի սպանելու կասկածանքով: Անցյալ տարի Չեխիայի դատարանը Անդրանիկ Սողոյանին արդարացման վճիռ է կայացրել եւ ազատել վերջինիս դատարանի դահլիճից։