WBO վարկածով երկրորդ միջին քաշային կարգում աշխարհի չեմպիոն Ռոբերտ Շտիգլիցը (42-2) մեկնաբանել է օգոստոսի 25-ին Բեռլինում կայանալիք մենամարտը` միջին քաշային կարգում աշխարհի նախկին չեմպիոն մեր հայրենակից Արթուր Աբրահամի (34-3) դեմ:
«Արթուրն ինձ հետ մենամարտելու իրավունք է ստացել: Նա դարձել է WBO տիտղոսի պարտադիր հավակնորդ: Վերջին տարիների ընթացքում բազմաթիվ բռնցքամարտիկներ են ստացել այդ կարգավիճակը, սակայն հրաժարվել են ինձ հետ մենամարտելուց:
Բոլորին է հայտնի, որ Աբրահամը հիանալի հարվածների է տիրապետում: Նա կռվել է Անդրե Ուորդի և Կառլ Ֆրոչի հետ և համապատասխան դասեր քաղել, փորձ ձեռք բերել:
Արթուրի նկատմամբ առավելության հասնելու համար հարկավոր է ուժ, մշտական պրեսինգ և հիանալի տակտիկա: Ես գիտեմ ինչպես խուսափել Աբրահամի հզոր հարվածներից: Պետք է անթերի կատարեմ աշխատանքս, որպեսզի բոլորին ապացուցեմ, որ լավագույնն եմ աշխարհում»,- Շտիգլիցին մեջբերում է Boxingscene-ը: