Թուրքիայի «Հզոր Թուրքիա» կուսակցության նախագահ Թունա Բեկլեւիչը հայ հասարակությանը հայտնի դարձավ այն բանից հետո, երբ խախտելով հայ-թուրքական սահմանը` Ախուրյան գետով մուտք գործեց Հայաստանի տարածք: Այսօր նա Հայաստանում է եւ հպարտորեն նշում է, թե նա այդ քայլն արել է՝ ի նշան բողոքի. «Սա մի քայլ էր, որով մենք ցանկանում էինք քննադատել երկու երկրների իշխանություններին սահմանի փակման համար: Այդ սահմանի բացումը խաղաղություն կբերի տարածաշրջանում»:
Հիշեցնենք, որ ռուս սահմանապահները հերքել էին այն տեղեկությունը, որ Բեկլեւիչը կարող էր Ախուրյան գետով անցնել սահմանը: Սակայն նրա խոսքերով, ինքը հենց գետով է անցել, եւ այդ հերքումներն իրեն չեն հետաքրքրում: Բեկլեւիչը նշեց, որ գետի այն մասը, որտեղով ինքն է անցել, բավականին ծանծաղ է, եւ որոշ հետքեր էլ վկայում էին, որ դա բավականին անցանելի ուղի է, եւ միայն ինքը չէ, որ այդտեղով անցել է. «Ցանկացած պահի, եթե ուզեք` կարող ենք գնալ եւ միասին անցնել այդ սահմանը»:
