«Ինչքան Վլադիմիր Պուտինը Ռուսաստանում թուլանա, այնքան Ռոբերտ Քոչարյանը իր ռեսուրսներով Հայաստանում թուլանալու է: Դա տեղի է ունենում. Ռուսաստանում Պուտինն ու իր կլանը գնալով թուլանում են, և Հայաստանում էլ թուլանում է այն կլանը, որի հովանավորը Պուտինն է»,- մեկնաբանելով ԲՀԿ համաձայնությունը կոալիցիոն հուշագրին, կարծիք հայտնեց ՆԺԿ առաջնորդ Արամ Կարապետյանը:
Արամ Կարապետյանի գնահատմամբ, այն, որ Ծառուկյանը ստորագրեց կոալիցիոն հուշագիրը, վկայում է այն մասին, որ Քոչարյանը թուլացել է, և թուլացել է այն կլանը, որին հովանավորում է Պուտինը:
Մինչդեռ ՀՀԿ-ական պատգամավոր Արտակ Զաքարյանի կարծիքով, համեմատականները սխալ են: Նա Հայաստանն ու Ռուսաստանը որպես կլանային չի բնութագրում. «Ռուսաստանը և Հայաստանը պետություններ են, որոնք ունեն նաև ընդհանուր ռազմավարական, տնտեսական շահեր, գտնվում են նույն տարածաշրջանում, և ունեն հստակ արտահայտված շահերի բավականին լայն ընդհանրություններ: Այս առումով համագործակցությունը, բնականաբար, պետք է լինի: Պետք չէ ռուսական քաղաքական շրջանակները բերել կապել հայկական քաղաքական շրջանակների հետ` Ռուսաստանը բոլորովին այլ ներքին սոցիալ-քաղաքական կառուցվածք ունի, Հայաստանը` բոլորովին այլ: