«Մենք պատմաբաններ չենք, մենք ամենից առաջ քաղաքական գործիչներ ենք եւ պիտի կամք արտահայտենք»,- ներկայացնելով իր ղեկավարած բարեկամության հանձնախմբի գործունեությունը` ասաց «Հզոր Թուրքիա» կուսակցության նախագահ Թունա Բեկլեւիչը:
Բեկլեւիչի ղեկավարած բարեկամության հանձնախումբը, որը, վերջինիս խոսքերով, հազարից ավելի անդամ ունի, եւ կեսն էլ հայեր են, նպատակ ունի աջակցելու հայ-թուրքական հարաբերությունների կարգավորմանը եւ «երկրորդ ցյուրիխյան գործընթաց սկսել»:
«Սա հասարակական ջանք է, մեզ ո՛չ Թուրքիայի կառավարությունն է ուղարկել, ո՛չ էլ Հայաստանի կառավարությունն է հրավիրել: Մենք ցանկանում ենք, որ այս խնդիրը լուծվի հենց երկու երկրների ժողովուրդների աջակցությամբ: Հայաստանի եւ Թուրքիայի միջեւ սահմանի բացումը միայն այդ երկու երկրների գործն է, եւ մենք ոչ մի արտաքին ուժ չենք ընդունում»:
«Հզոր Թուրքիա» կուսակցության փոխնախագահ Բայբարս Օրսեքն էլ նշեց, որ Հայաստան գալով եւ այստեղի երիտասարդական կառույցների հետ հանդիպելով՝ իրենք ցանկանում են մշակել խնդրի լուծման սեփական ճանապարհային քարտեզը եւ առաջարկել երկու երկրների իշխանություններին:
Հարցին, թե արդյո՞ք հայ եւ թուրք ժողովուրդների բարեկամության կողմնակիցները պատրաստվում են այցելել Հայոց ցեղասպանության հուշահամալիր, Բեկլեւիչը պատասխանեց. «Չենք այցելելու եւ չենք ուզում, որ սահմանի բացումը առնչվի այս խնդրի հետ: Առաջին փուլում մենք պետք է աշխատենք հայ-թուրքական սահմանի բացման ուղղությամբ, եւ հետո նոր կքննարկենք մնացյալ հարցերը»: