«Իշխող կոալիցիան հասկանում է, որ ապակայունացում է լինելու: Սերժ Սարգսյանը հասկանում է, որ առաջիկա ընտրություններում չի ստանալու ժողովրդի վստահության քվեն և այդ պատճառով փորձում է ապավինել այն քաղաքական կուսակցություններին, որոնք Սերժ Սարգսյանին դարձրին նախագահ, և ապավինել այն ուժային կառույցներին, որոնց վրա մինչ այժմ հենվել է Քոչարյան-Սարգսյան տանդեմը»,- լրագրողների հետ հանդիպման ժամանակ ասաց ՆԺԿ առաջնորդ Արամ Կարապետյանը:
Կարապետյանը նշեց, որ քաղաքական էթիկայից ելնելով՝ ինքը չի կարող խոսել ՀՀԿ-ԲՀԿ կոալիցիոն համաձայնագրի մասին, բայց այն հայտարարությունը, թե կոալիցիայի չփլուզվելը հաղթանակ է, ըստ Արամ Կարապետյանի, անտրամաբանական է: Նրա գնահատմամբ, այդ հուշագրի ստորագրումով ոչինչ չփոխվեց, մնաց այն, ինչ կար:
Արամ Կարապետյանի ընդդիմախոս, ԱԺ ՀՀԿ-ական պատգամավոր Արտակ Զաքարյանն էլ նշեց, որ կոալիցիոն հուշագրի ստորագրումով առաջին հերթին շահում է Հայաստանի Հանրապետությունը:
«Սա դիրքերի ամրապնդում չէր, քանզի կոալիցիոն ուժերը դրա կարիքը չունեին: Սա քաղաքական մոդել է, որով կոալիցիայի մեջ մտնող քաղաքական երեք ուժերը վստահեցնում են, որ շարունակում են միասնական ուժերով լուծել երկրի առջև ծառացած խնդիրները»:
