ԲՀԿ նախագահ Գագիկ Ծառուկյանի մամուլի խոսնակ Խաչիկ Գալստյանը չի բացառում, որ կոալիցիոն կուսակցություններն առաջիկա խորհրդարանական ընտրություններին մասնակցեն միասնական ցուցակով: Ըստ նրա՝ այդ հարցը դեռ չի քննարկվել, և որոշում չի կայացվել, սակայն չի բացառվում նման հավանականությունը:
«Կարևորն այն է, որ միասնական ֆորմատով, միասնական ճակատով մասնակցենք»,- ասաց նա՝ մեկնաբանելով, թե միասնական ճակատ ասելով՝ նկատի ունի կա՛մ միասնական ցուցակը, կա՛մ որ առանձին-առանձին մասնակցելուց հետո կոալիցիոն կուսակցությունները միավորեն ստացված ձայները:
Նա նաև ասաց, թե լավ կլիներ, եթե ընդդիմությունն էլ միավորվեր:
Ի դեպ, Խ. Գալստյանի կարծիքով, ընդդիմադիր դաշտում բավականին լուրջ ուժեր կան, և իշխանությունները պետք է դա հաշվի առնեն: Նա զուգահեռներ անցկացրեց նաև 2007 թ. ԱԺ ընտրությունների հետ՝ նշելով, որ այն ժամանակ ընդդիմադիր դաշտում այս վիճակը չէր:
Իսկ ընդդիմադիր լուրջ ուժեր ասելով՝ Գալստյանը նկատի ունի Հայ ազգային կոնգրեսին, ՀՅԴ-ին և «Ժառանգությանը»:
