«Հզոր Թուրքիա» կուսակցության նախագահ Թունա Բեկլեւիչը Հայաստան է եկել մեկ բաժակ սուրճ կամ թեյ հյուրասիրվելու ակնկալիքով, սակայն այդպես էլ այդ պատվին չի արժանացել: Կուսակցության նախագահը անկեղծանալով նշեց, թե իր սիրտը կոտրվել է, եւ չափազանց տխրել է ՀՀ ԱԳՆ-ի վերաբերմունքից: «Գալով Հայաստան` կուզենայի ՀՀ ԱԳՆ-ում մեկ բաժակ սուրճ կամ թեյ խմել, քանի որ մեկ բաժակ սուրճը 40 տարվա հիշողություն ունի»,- ասաց Բեկլեւիչը:
Բեկլեւիչի խոսքերով, իրենք նամակ էին ուղարկել Հայաստանի արտգործնախարարություն` խնդրանքով, որ կարողանան այստեղ ժողով անցկացնել, սակայն հստակ պատասխան չեն ստացել. «Նրանց պատասխանը միայն հայ-թուրքական գործընթացին էր վերաբերում, եւ խոսք չկար ժողովի մասին: Մենք արդեն երեք անգամ գալիս ենք Հայաստան եւ ձեր արտգործնախարարության կողմից արժանանում նման վերաբերմունքի: Մենք հզոր ուժ ենք Թուրքիայում, եւ եթե այսօր ընդդիմություն ենք, դա չի նշանակում, որ վաղը չենք կարող իշխանություն դառնալ: Հնարավոր է, որ վաղը հայ-թուրքական արձանագրությունների տակ մենք ստորագրենք: Եթե նրանք այսօր մեզ անգամ մեկ բաժակ թեյ չեն հյուրասիրում, վաղն ինչպես պետք է նստենք մեկ սեղանի շուրջ»:
Թունա Բեկլեւիչը շեշտեց, որ իրենց կուսակցությունը միշտ աջակցել է Թուրքիայի հայերին: Նրա խոսքերով, Հրանտ Դինքի սպանությունից հետո թուրքական իշխանություններին ամենաուժեղ հակազդեցությունը հենց «Հզոր Թուրքիա» կուսակցությունն է ցույց տվել: