Լոս Անջելեսի հայկական համայնքը հայտնվել է ոչ միանշանակ իրավիճակում այն բանից հետո, երբ այդ քաղաքում և ԱՄՆ մի շարք այլ վայրերում ձերբակալել են «Հայկական ուժ» հանցավոր խմբավորման ավելի քան 70 անդամների: Նրանց մեղադրում են տարբեր աստիճանի ծանր հանցանքներ գործելու մեջ, որի մասին «Առաջին լրատվականը» տեղեկացրել էր:
Հայկական համայնքը մտահոգված է, որ հայերի հետ կապված այս հանցագործությունները կարող են նոր կարծրատիպեր առաջացնել մեր նկատմամբ: «Այստեղ քրտնաջան աշխատող բազմաթիվ հայեր կան, որոնք մասնակցել են այս քաղաքի կայացմանը, և, ինչպես մյուս մշակույթներում, կարելի է տեսնել թե՛ լավը, թե՛ վատը»,- նշել է Գելնդելի հայ ծառայողներից Արդի Քասախյանը: «Ամենալավը, որ կարող ենք ակնկալել, այն է, որ մարդիկ չեն օգտագործի այս լուրը համայնքը տարբաժանելու համար»,- նշել է նա:
Քրեական խմբավորումներում հիմնականում երիտասարդների ընդգրկումը, ըստ հայ համայնքի ներկայացուցիչների, կապված է համապատասխան սոցիալական ծրագրերի բացակայությամբ: Հայ բարեգործական ընդհանուր միության «Հաջորդ սերունդ» ծրագրի տնօրենը կարծում է, որ եթե ուզում ենք այս վիճակից դուրս գալ, ապա անհրաժեշտ է վերականգնել պատանիների հետ կապված սոցիալական ծրագրերը: Նրա խոսքերով` հանցավոր խմբերում հայտնված պատանիներն ու երիտասարդները հիմնականում անապահով ընտանիքներից են, և դպրոցից հետո անհրաժեշտ ծրագրեր չիրագործելու դեպքում դժվար է լինում նրանց հեռու պահել հանցավոր խմբավորումներում ընդգրկվելուց: «Եթե մենք սա չանենք, կարող ենք ակնկալել, որ այս երևույթը անընդհատ կկրկնվի»,- ավելացրել է նա: Այս մասին հաղորդում է The Glendale News Press-ը: