Անչափահասների հանցավորության հիմնախնդիրը անհանգստացնող է ողջ աշխարհում` անկախ այն հանգամանքից, թե որքանով է քրեածին իրավիճակով բարվոք տվյալ երկիրը: Ու թեև 100 հազար բնակչին բաժին ընկնող հանցավորության մակարդակով Հայաստանի Հանրապետությունում վիճակն ինչպես ԱՊՀ, այնպես էլ` եվրոպական մի շարք երկրներում արձանագրված հանցավորության ցուցանիշների համեմատությամբ բավական ցածր է, մենք էլ այս առումով մտածելու շատ բան ունենք:
ՀՀ Ոստիկանության քրեական հետախուզության գլխավոր վարչության 3-րդ վարչության պետի տեղակալ, անչափահասների գործերով ծառայության պետ« ոստիկանության գնդապետ Նելլի Դուրյանը մեր հետ զրույցում նշեց, որ անչափահասների շրջանում իրականացվող կանխարգելիչ աշխատանքների շրջանակներում այժմ բազմաբնույթ, նպատակային ծրագրեր են իրականացվում` ուղղված երեխաների իրավունքների պաշտպանությանը:
Դրանցից ոստիկանության գնդապետն առանձնացրեց հանրապետության հանրակրթական դպրոցներում իրականացվող ԱՄՆ Պետդեպարտամենտի թմրանյութերի դեմ պայքարի և իրավապահպանման հարցերով միջազգային բյուրոյի կողմից ֆինանսավորվող «ԶԱՆԳ» իրավական սոցիալականացման ծրագիրը` «Զարգացնենք արդարադատությանը նպաստող գաղափարները» վերնագրով, որում ընդգրկված են եղել 800 ուսուցիչներ և ոստիկաններ:
Բացի դրանից` 2010 թվականի սեպտեմբեր ամսից Երևան քաղաքի 11 ավագ դպրոցներում մեկնարկել է դպրոցական տեսուչի փորձնական ծրագիրը, որը ներառված է ՀՀ ոստիկանության իրավասությանը վերաբերող հանցագործությունների կանխարգելման պետական ծրագրով նախատեսված միջոցառումների մեջ:
Անչափահասների շրջանում իրականացվող կանխարգելիչ աշխատանքների շրջանակներում ՀՀ 7 մարզերում արդեն շուրջ 4 տարի է` ստեղծվել և գործում են 7 համայնքային վերականգնողական կենտրոններ` Երևանում, Վանաձորում, Իջևանում, Գյումրիում, Թալինում, Ճամբարակում և Թումանյանում:
Նելլի Դուրյանի խոսքով, վերոհիշյալ կենտրոնները աննախադեպ են այն առումով, որ այստեղ իրավախախտ երեխայի հետ աշխատում է ոչ միայն ոստիկանը, այլև մանկավարժը, սոցիալական աշխատողը և հոգեբանը, իսկ կենտրոններում իրավախախտ անչափահասների հետ կատարված աշխատանքների արդյունավետությունը հիմք է տալիս ստեղծել նմանատիպ կենտրոններ նաև ՀՀ այլ մարզերում:
