«Մեթյու Բրայզայի հայտարարությունը, թե հանդիպումը լինելու է Սոչիում` նշանակում է, որ Ռուսաստանի մասնակցության խնդիր չկա: Եթե դա լիներ մեկ այլ տեղ, կարելի էր մտածել, որ Միացյալ Նահանգները փորձում է Ռուսաստանից առանձին աշխուժացում ցուցաբերել ղարաբաղյան խնդրի կարգավորման գործում»,- անդրադառնալով մարտի 5-ին Սոչիում կայանալիք Մեդվեդև-Սարգսյան-Ալիև հանդիպմանը և Ադրբեջանում ԱՄՆ նորանշանակ դեսպան Մեթյու Բրայզայի հայտարարությանը` նշեց ՌԱՀՀԿ փորձագետ Մանվել Սարգսյանը:
Սարգսյանի կարծիքով, համանախագահները միասին փորձում են միասնական գործ կատարել և ինչ-որ բան են մտածել` ակտիվացնելու բանակցային պրոցեսը Աստանայից հետո:
Խոսելով փետրվարի 24-25-ը ԱՄՆ պետքարտուղարի տեղակալ Ջեյմս Սթայնբերգի Հայաստան այցելությանը` Սարգսյանը նշեց, թե բնական է, որ նման պաշտոնյաների այցի ընթացքում ղարաբաղյան հարցը քննարկվելու է: Սարգսյանը համոզված է, որ համանախագահող երկրները ցանկանում են միասնական գործ անել:
Մանվել Սարգսյանը հավանական չհամարեց այն հանգամանքը, որ սպասվելիք հանդիպման ժամանակ որևէ պայմանավորվածություն ձեռք կբերվի, քանզի Իլհամ Ալիևի վերջին ելույթները ուլտիմատումի տեսք ունեն, և այդ պայմաններում դժվար թե կողմերը փոխեն իրենց դիրքորոշումները: