«Սիրո տոնը նշելը կեղծ է, քանի որ այն երկրում, որտեղ մենք ապրում ենք, համատարած սիրո բացակայություն է: Այս պայմաններում կեղծ է ընդհանուր տոնի մասին խոսելը: Այն, ինչ դուրս է գալիս այս մթնոլորտ, անմիջապես պղծվում է, իսկ դատարկ տարածքները լցվում են մթով»,- «Առաջին լրատվականի» հետ զրույցում ասում է բեմադրիչ, դրամատուրգ Խաչիկ Չալիկյանը:
Սիրո համար առանձին օր պետք չէ, ամեն օր պիտի լինի սիրո տոն` կարծում է Չալիկյանը: «Սիրո մասին չպետք է մոռանանք, ու դրա մասին հիշեցնելու հատուկ օր պետք չէ: Քանի որ չկա սեր, հորինում են տոներ, դարձնում հասարակական քննարկման նյութ ու պաշտոնական երևույթ»,- տոնի կազմակերպումը այսպես է մեկնաբանում դրամատուրգը:
Զգացմունքները պիտի զգալ, ոչ թե խոսել այդ մասին: «Խոսում են այն բաների մասին, որոնք չկան: Անընդհատ խոսում ենք հայրենիքի մասին, հայրենասիրության մասին, որովհետև այդ գաղափարները մենք տանուլ ենք տվել, այդ թվում նաև սիրո ընկալումը: Սերը արհեստածին չի կարող լինել. այն կամ կա, կամ`ոչ»,- խոսքն ավարտում է Խաչիկ Չալիկյանը: