ՀԺԿ նախագահ Ստեփան Դեմիրճյանը այսօր ՀԱԿ-ի հրավիրած հանրահավաքում շեշտեց, որ ընդդիմության պահանջը հստակ է. «Երկրում պետք է ազատ ու արդար ընտրություններ անցկացվեն: Քանի դեռ ազատ–արդար ընտրություններ չանցկացվեն մեր երկրում, որակական փոփոխություններ չեն լինի»։ Ստեփան Դեմիրճյանն ահազանգեց, որ այսօր երկրում 1 միլիոնից ավել մարդ աղքատ է։
«Փետրվարի 19-ը դարձել է ընտրակեղծիքի օր: Վարչախումբը, կոալիցիա կազմող ուժերը երկրի առջև կանգնած խնդիրները լուծելու, սոցիալական աղետը կանխելու փոխարեն մտահոգված են միայն իրենց վերարտադրությամբ»,– նշեց Դեմիրճյանը՝ անդրադառնալով կոալիցիայի երեկվա ստորագրած հուշագրին։
Ըստ նրա՝ հուշագրով ամրագրվում է, որ երկրում փոփոխությունները շարունակվելու են։ «Բայց հայտնի չէ՝ ինչ փոփոխությունների մասին է խոսքը՝ աղքատության ավելացմա՞ն, սոցիալական բևեռացմա՞ն»,– հարցադրում արեց Դեմիրճյանը։
«Իրական փոփոխությունների, սոցիալական արդարության և օրինականության հաստատման մենք կհասնենք մեր միասնական պայքարի շնորհիվ», հայտարարեց Ս.Դեմիրճյանը` նկատելով. «Այսօրվա հանրահավաքը ցույց է տալիս, որ մենք դրան հասնելու ենք»:
