23:24 ՄԱԿ-ի Մարդու իրավունքների գլխավոր հանձնակատար Նավի Փիլայը հայտարարել է, որ Լիբիայի և Բահրեյնի անվտանգության ծառայությունները անհամաչափ ուժ են կիրառել ցուցարարների դեմ: Նա դատապարտել է Ալժիրում, Բահրեյնում, Իրաքում, Լիբիայում և Եմենում ցուցարարների սպանությունը. «Մերձավոր Արևելքը և Հյուսիսային Աֆրիկան եռում են զայրույթից», նշել է Փիլայը:
23:09 Ինչպես հաղորդել է Սպիտակ տան նորանշանակ խոսնակ Ջեյ Քերնին, ԱՄՆ նախագահ Բարաք Օբաման խորը մտահոգություն է հայտնել Բահրեյնում, Լիբիայում և Եմենում տեղի ունեցող իրադարձությունների կապակցությամբ և զսպվածության կոչ է արել այդ երկրների կառավարություններին ցուցարարների հետ հարաբերություններում:
22:44 Քանի որ Լիբիայից լրատվություն ստանալը գրեթե անհնար է, ապա շատ լրատվամիջոցների համար լուրերի ամենալավ աղբյուր է դարձել Twitter միկրոբլոգերի կայքը: Ըստ որոշ տեղեկությունների, որոնք հայտնվել են այդ սոցիալական կայքում, քիչ առաջ ցուցարարներին հաջողվել է վերահսկողություն հաստատել նաև Լիբիայի երկրորդ քաղաքի` Բենղազիի նկատմամբ, որտեղ առավել արյունալի բախումներն են տեղի ունեցել: Հայտնի է նաև, որ ցուցարարներին հաջողվել է վերահսկողության տակ վերցնել նաև տեղի ռադիոընկերությունը, և շուտով նրանք հանդես են գալու ուղերձով:
21:19 Ինչպես հենց նոր փոխանցեցին համաշխարհային լրատվամիջոցները, հղում կատարելով Reuters գործակալությանը, Լիբիայի ղեկավար Մուամար Քադաֆիին ընդդիմադիր ուժերին հաջողվել է ամբողջապես վերահսկողության տակ առնել Լիբիայի մեծությամբ երրորդ քաղաքը` Ալ-Բայդան: Սա տեղի է ունեցել այն բանից հետո, երբ քաղաքի ոստիկանությունն անցել է ցուցարարների կողմը:
Ըստ գործակալության` ոստիկանությանն այս քայլին է դրդել այն հանգամանքը, որ քաղաքում հայտնվել են Աֆրիկայի այլ երկրներից ժամանած վարձկաններ, որոնք առանձնակի դաժանությամբ սկսել են ճնշել ցուցարարներին: Ոստիկանությանն ու ցուցարարներին հաջողվել է համատեղ ուժերով մաքրել քաղաքը եկվորներից:
Ըստ Twitter-ից ստացվող տվյալների`ոստիկանությունը ցուցարարների կողմն է անցնում նաև Ալ-Մարջ և Դեռնա քաղաքներում: Իսկ Բենղազիում շարունակվում են ամենամեծածավալ ցույցերը, որտեղ կան բազմաթիվ զոհեր և վիրավորներ:
«Առաջին լրատվականը» տեղեկացրել էր, որ բախումները Լիբիայում շարունակվում են արդեն մի քանի օր շարունակ: Ըստ տարբեր տվյալների` զոհվել է 25-50 մարդ, կան հարյուրավոր վիրավորներ: Բախումներն էլ ավելի են սաստակացել այսօր, երբ տեղի են ունեցել երեկ զոհվածների թաղման արարողությունները: Ցուցարարները պահանջում են 1969թ.-ից երկիրը ղեկավարող Մուամար Քադաֆիի հրաժարականը: