Այսօր Հորդանանի մայրաքաղաք Ամմանում Թուրքիայի ու Հորդանանի միջև պայմանագիր է ստորագրվել միջուկային համագործակցության մասին, հաղորդում է Xinhua գործակալությունը:
Պայմանագիրը նախատեսում է միջուկային ռեակտորների գործարկման, վերափոխման և սպասարկման համար համագործակցություն և փորձի փոխանակում: Նաև ստեղծվելու է համատեղ աշխատանքային խումբ` համատեղ նախագծեր մշակելու և իրականացնելու, ինչպես նաև գիտական հետազոտությունների համար:
«Պայմանագրի ստորագրումը երկու երկրների միջև հարաբերությունների հիմնաքարն է և Հորդանանի միջուկային ծրագրին միջազգային աջակցություն է ապահովում: Մի քանի երկրների հետ միջուկային համաձայնագրերը Հորդանանի համար ապահովում են անհրաժեշտ քաղաքական աջակցություն, քանի որ մենք ապրում ենք շատ զգայուն տարածաշրջանում»,- ասել է Հորդանանի էներգետիկայի նախարար Խալեդ Թուկանը:
Թուրքիայի միջուկային իշխանությունների ներկայացուցիչ Թաֆեր Ալբերն, իր հերթին, հայտնել է, որ իր երկիրը պատրաստ է կրթել ոլորտի հորդանանցի ուսանողների:
Հորդանանը նախատեսում է 4 միջուկային ռեակտոր կառուցել: