2010 թվականի համեմատ` 2011 թվականին կենսամակարդակը ընդհանուր առմամբ բարձրացել է 3 տոկոսով` 44.6 տոկոսից դառնալով 47.6: Հայաստանի քաղաքային շրջաններում մարդիկ ավելի դժգոհ են իրենց կենսամակարդակից, քան գյուղական շրջաններում:
Ինչպես այսօր ասուլիսում հայտնեց սոցիոլոգիական հետազոտությունների խորհրդատվությունների վերլուծաբան Սամվել Մանուկյանը, գյուղական բնակավայրերում մարդիկ ավելի ցածր ամբիցիաներ ունեն, քան քաղաքներում: Նա նշեց, որ հարցումն անցկացվել է 2011-ի նոյեմբերին` 2000 քաղաքացիների շրջանում:
Մարդիկ ավելի շատ աշխատանքի կարիք ունեն և դժգոհ են գների մակարդակից: Դրական տեղաշարժ է գրանցվել դատական համակարգում, ինչից բավարարվածների թիվն ավելացել է 11 տոկոսով և 2010 թվականի 25 տոկոսից 2011 թվականին դարձել 36 տոկոս:
Մանուկյանի ներկայացմամբ` հարցվածների 10.3 տոկոսը օբյեկտիվորեն լավ է ապրում և գոհ է իր վիճակից, 3.10 տոկոսը լավ է ապրում, սակայն դժգոհ է, 49 տոկոսը վատ է ապրում, բայց համակերպվել է իր վիճակին, 37.4 տոկոսը օբյեկտիվորեն վատ է ապրում և դժգոհ է իր վիճակից:
Նշենք, որ հարցումն իրականացվել է ՀՀ կառավարության պատվերով:
