ԿԲ նախկին նախագահ Բագրատ Ասատրյանը, որը վերջերս էր վերադարձել Գերմանիայից, իր հետ բերել էր այնտեղի սուպերմարկետներից մեկի ապրանքների ու դրանց գների ցուցակները, որպեսզի համեմատի հայաստանյան գների հետ:
«Իհարկե, ամենաթանկ խանութներինը չեմ բերել, ես ամենաէժան խանութների ապրանքների գներն եմ բերել: Իմ նպատակն էր փորձել ու գնահատել՝ ոչ շատ լավ ապրող եվրոպացին, եթե ֆինանսական խնդիրներ ունի, ի՞նչ գնով կարող է ձեռք բերել անհրաժեշտ ապրանքներ, և ինչպիսի՞ համեմատություն կարող ենք անել հայ գնորդի հետ»,- նշեց Բ. Ասատրյանը:
Ըստ այդմ` կարտոֆիլը ՀՀ-ում մոտ 1.5 անգամ ավելի թանկ է, քան Գերմանիայում: Շուրջ 1.5 անգամ Գերմանիայի համեմատ Հայաստանում թանկ է նաև խնձորը: Ընդհանուր առմամբ, ըստ Բ. Ասատրյանի, և՛ «բանջարեղեն», և՛ «միրգ», և՛ «մսամթերք» ապրանքախմբի գները մեզ մոտ ավելի թանկ են, քան Գերմանիայի այդ սուպերմարկետներում:
