Թեղուտի պաշտպանության քաղաքացիական նախաձեռնությունը հայտարարություն է տարածել, որում մասնավորապես ասված է.
Արմանիսին հարակից տարածքում «Սագամար» ՓԲ ընկերությանը պատկանող ոսկու հանքավայրի շահագործումն սկսելուց ի վեր պարբերաբար աղտոտվում է հանքավայրին հարակից Ձորագետը: Այս խնդրի առնչությամբ դեռևս 2012 թվականի փետրվար ամսին Ստեփանավանի քաղաքապետարանին կից ստեղծվել էր մոնիթորինգային խումբ, որը պետք է ուսումնասիրություն իրականացներ և պարզեր գետի աղտոտման պատճառները: Այդ խմբի աշխատանքների և դրանց արդյունքների վերաբերյալ մինչ օրս որևէ տեղեկատվություն չի հրապարակվել:
Վերոհիշատակյալ «Սագամար» ընկերությունը իր ստացած` հանքավայրի շահագործման լիցենզային պայմանագրի համաձայն իբր պետք է աշխատի գերժամանակակից` փակ ջրաշրջանառության եղանակով, առանց շրջակա միջավայր թափոններ արտանետելու: Հիշեցնենք, որ այդ նույն` գերժամանակակից լուծումներով է խոստանում աշխատել նաև Ամուլսարի շահագործման համար տվայտվող ընկերությունը:
Օրեր առաջ հերթական անգամ գետն աղտոտվել է անհասկլանալի բաղադրություն ունեցող մեծածավալ կեղտաջրերով, որի համար ոչ ոք պատասխանատվություն չի ստանձնել, իսկ բնապահպանական տեսչությունը մինչ օրս որևէ գործողություն չի կատարել: Հաշվի առնելով հայաստանյան այն իրականությունը, որ բնապահպանական տեսչությունը բացարձակ անգործության է մատնված, Հայաստանում չեն պահպանվում հանքարդյունահանող ընկերությունների լիցենզային պայմանագրերով սահմանված բնապահպանական նորմերն ու անվտանգության պայմանները:
Մենք հետամուտ ենք լինելու Ձորագետի աղտոտման պատճառները պարզելու և բոլոր մեղավորներին պատասխանատվության ենթարկելու համար: Կոչ ենք անում Ստեփանավան քաղաքի և հարակից համայնքների երիտասարդներին համախմբվել Ստեփանավանի և Լոռվա մարզի բնության պահպանության նպատակով: Մենք պատրաստ ենք ամեն կերպ աջակցել տեղի բնակիչներին հանքարդյունաբերական չարիքի դեմ պայքարելու գործում և ակնկալում ենք ձեր գործուն մասնակցությունը Ստեփանավանը, Թեղուտը, Ջերմուկը և մեր երկրի մյուս հատվածները կեղեքիչ շահագործումից պաշտպանելու համար:
