Թուրքական ATV հեռուստաալիքին տված հարցազրույցի ժամանակ Թուրքիայի վարչապետ Ռեջեփ Էրդողանը անդրադարձել է Սիրիայի նախագահ Բաշար Ասադի ու Թուրքիայում ահաբեկչական հռչակված ու արգելված «Քրդստանի աշխատավորական» կուսակցության (PKK) միջև կապերին.
«Բաշար Ասադն աջակցում է ահաբեկչական PKK-ին՝ հույս ունենալով դրա շնորհիվ խնդիրներ ստեղծել Թուրքիայի համար: Ասադի կողմից աջակցություն ստացող PKK-ի անդամները փորձում են ներթափանցել Թուրքիա: Ահաբեկչական կազմակերպության մոտ 200 անդամ, որոնք փորձում էին մուտք գործել Թուրքիա և ահաբեկչություններ կազմակերպել նրա տարածքում, ժամանակին ձերբակալվել ու վնասազերծվել են:
Դավութօղլուի այցը դեպի քրդական ինքնավարությունը միտված էր ահաբեկչության խնդրի լուծմանը: Քրդական վարչակազմի հետ բանակցությունների ժամանակ մենք հասկացնել տվեցինք, որ եթե ահաբեկչական PKK-ն նրանից աջակցություն ստանա, ապա վերջ կտրվի Թուրքիայի ու ինքնավարության միջև բարեկամական հարաբերություններին»:
Հիշեցնենք, որ երեկ Հաքքարի նահանգում գրանցված բախման ժամանակ PKK-ի զինյալները սպանել էին 8 և վիրավորել էին 15 զինծառայողի ու 1 գյուղական պահապանի:
