Հայաստանի և Չինաստանի արտաքին գործերի նախարարներ Էդվարդ Նալբանդյանը և Յան Ձիեչինը լրագրողների հետ հանդիպման ժամանակ կարևորեցին երկկողմ հարաբերությունների զարգացումը և առաջխաղացումը:
Էդվարդ Նալբանդյանը, ողջունելով չինացի իր գործընկերոջը, նշեց, որ քննարկվել են երկուստեք հետաքրքրություն ներկայացնող հարցեր, ինչպես նաև երկու երկրների նախագահների միջև ձեռք բերված պայմանավորվածությունների իրականացման ընթացքը: Նալբանդյանը տեղեկացրեց, որ հանդիպմանը անդրադարձ է կատարվել Հայաստանի և Չինաստանի միջև առևտրատնտեսական համագործակցությանը, կրթական, մշակութային փոխանակման ծրագրերի խթանմանը և իրավապայմանագրային դաշտի կատարելագործմանը:
«Երկկողմ տնտեսական կապերի զարգացման վկայությունն են Չինաստանի Շանսի նահանգում գործող «Շանսի Նաիրիտ» համատեղ ձեռնարկությունը, Հայաստանում Չինաստանի կողմից իրականացվող տնտեսական ծրագրերը, ՀԷԿ-երի կառուցումը, հեռահաղորդակցության բնագավառում համագործակցությունը»,- նշեց Նալբանդյանը:
Նա նաև շնորհակալություն հայտնեց Չինաստանին տեխնիկական աջակցության համար և տեղեկացրեց, որ միայն այս տարվա ընթացքում Չինաստանը Հայաստանին է տրամադրել 8 տասնյակ շտապօգնության մեքենաներ, պայմանավորվածություն կա, որ հետագայում էլ տրամադրվելու են ավտոբուսներ:
«Մոտ օրերս ՀՀ կառավարության կողմից Չինաստանի քաղաքացիների համար մուտքի արտոնագրային ռեժիմի դյուրացման վերաբերյալ ընդունված որոշումը նոր թափ կհաղորդի երկու երկրների միջև գործունեությանը և մշակութային հարաբերություններին»,- ասաց Նալբանդյանը և հավելեց, որ համագործակցության պայմանավորվածություն է ձեռք բերվել նաև էներգետիկայի, հանքարդյունաբերության, տրանսպորտի, գյուղատնտեսության և առողջապահության ոլորտում:
