Իրանական Fars News լրատվական գործակալության փոխանցմամբ՝ Իրանը պատրաստակամություն է հայտնել նախադրյալներ ստեղծել Սիրիայի կառավարության ու ընդդիմության միջև երկխոսության իրականացման և Թեհրանում նրանց միջև բանակցությունների անցկացման համար:
Այս մասին Թուրքիայի փոխարտգործնախարար Հալիդ Չևիքի հետ հանդիպման ժամանակ հայտարարել է Իրանի արտգործնախարար Ալի Աքբար Սալեհին: Վերջինս Չևիքի հետ քննարկել է տարածաշրջանային մի շարք հարցեր:
Սալեհին հայտարարել է. «Մենք հուսով ենք, որ Սիրիայում վերականգնվելու է խաղաղությունն ու կայունությունը: Չեն արդարացել Սիրիայի կառավարության տապալման վերաբերյալ մի շարք ուժերի ակնկալիքները: Իրանի կառավարությունը մշտապես հայտարարել է սիրիական հարցի՝ բացառապես բանակցային ճանապարհով լուծելու անհրաժեշտության մասին:
Մենք աջակցում ենք Սիրիայի հարցում ՄԱԿ-ի ու ԱՊԼ-ի հատուկ ներկայացուցիչ Քոֆի Անանի խաղաղության պլանին: Թուրքիան կարևոր դերակատարություն ունի տարածաշրջանում: Իրանն ու Թուրքիան տարածաշրջանային բազմաթիվ հարցերում ունեն ընդհանուր դիրքորոշում»:
