Այսօրվանից թերևս կարելի է ասել, որ Հայաստանի իշխող կոալիցիան բաղկացած է ՀՀԿ-ից և ՕԵԿ-ներից: ԲՀԿ նախագահ Գագիկ Ծառուկյանի այն հայտարարությունը, թե Բարգավաճը ստորագրելու է իշխող կոալիցիայի հայտարարությունն այն մասին, որ կոալիցիան նախագահի ընտրության է գնալու միասնական թեկնածուով ի դեմս Սերժ Սարգսյանի, ուղղակի վկայությունն է այն բանի, որ Հայաստանի քաղաքական դաշտում մի կուսակցական սուբյեկտ դադարեց գոյություն ունենալ: Խոսքը բնականաբար Բարգավաճ Հայաստան կուսակցության մասին է:
Եթե այդ կուսակցությունը նախագահի ընտրությունից երկու տարի առաջ, և գլխավորը` խորհրդարանի ընտրությունից մեկ տարի առաջ հայտարարում է Սերժ Սարգսյանի թեկնածությունը նախագահի ընտրությանը սատարելու մասին, ապա անկասկած է, որ այդ կուսակցությունը խորհրդարանական ընտրություններին չի կարող ներկայանալ իբրև քաղաքական առանձին միավոր: Այլ կլիներ իրավիճակը, եթե Ծառուկյանը Սերժ Սարգսյանին սատարելու մասին հայտարարեր խորհրդարանական ընտրություններից հետո, թեկուզ հենց հաջորդ իսկ օրը:
Բայց երբ նա այդ բանն անում է ընտրություններից մեկ տարի առաջ, այն էլ այն դեպքում, երբ ամիսներ առաջ հայտարարել էր, թե դնելու է խորհրդարանական ընտրություններում 50+1 տոկոս շահելու խնդիր, ապա այդ իսկ պահից Ծառուկյանը դադարում է քաղաքական գործոն լինելուց: Նա արդեն դառնում է Արթուր Բաղդասարյան, այսինքն ՀՀԿ կցորդ, որի ճակատագիրը ամբողջությամբ կախված է լինում միայն ու միայն ՀՀԿ կամքից ու ճակատագրից:
Ինչպես ՕԵԿ-ն է այսօր դարձել ՀՀԿ պահանջների սպասարկուն, այդպես էլ Գագիկ Ծառուկյանն է վերածվում ՀՀԿ-ին սպասարկող մի կառույցի: Շատերի համար միգուցե սա նորություն չթվա, և շատերը միգուցե ասեն, որ Ծառուկյանը միշտ էլ եղել է ՀՀԿ-ին կամ Սերժ Սարգսյանին սպասարկողը, սակայն դա իհարկե այդպես չէ, որովհետև Ծառուկյանն ակնհայտորեն դիմադրում էր, ինչի վկայությունն այն է, որ համաձայնությունը եղավ բավական վայրիվերումներից հետո միայն:
Ծառուկյանը շատ լավ գիտակցում էր, որ հակառակ դեպքում նրան արթուրբաղդասարյանացում էր սպառնում: Բայց, ըստ երևույթին, Ծառուկյանը չկարողացավ ուժ գտնել Սերժ Սարգսյանի ճնշումներին դիմակայելու համար:
Չի բացառվում նաև, որ այստեղ գործ ունենք ոչ թե Ծառուկյանի, այլ Ռոբերտ Քոչարյանի որոշման հետ, որը իքս պահին խառնվեց գործընթացներին իր հարցազրույցով, միգուցե ինչ-որ պայմանավորվածություն ձեռք բերեց Սերժ Սարգսյանի հետ, և դրանից հետո իգրեք պահին էլ հանձնեց Ծառուկյանին: